Улсын онцгой комисс өнөөдөр хуралдаж зарим шийдвэрийг гаргалаа. Энэ талаар Улсын онцгой комиссын дарга Ө.Энхтүвшин “Байдал амаргүй байна. Дэлхийн 99 оронд covid-19-ийн халдвар дархаж, өвчилсөн хүмүүсийн тоо нэмэгдсээр байна. Тиймээс бид тайвширч болохгүй. Хийж буй ажлаа сайжруулж, сонор сэрэмжээ сайжруулах шаардлагатай байна. Тусгаарлах байр олныг гаргасан. Одоогоор 500 орчим хүн тусгаарлах байранд бий” гэв.

Харин Эрүүл мэндийн сайд Д.Сарангэрэл “Улсын онцгой комиссын ес дэх хурал боллоо. Шадар сайд мэдээллийн эхэнд хэлсэнчлэн 99 оронд халдвар тархаж, 106 мянга 139 хүн халдвар авч, 3600 хүн нас бараад байна. ДЭМБ улс орнуудад зөвлөгөө өгсөөр байгаа. Дэлхийн бөмбөрцгийн нэг ч орон манайд халдвар гарахгүй гэж бодож болохгүй гэж зөвлөж байгаа. ДЭМБ-ын зөвлөмжийн хүрээнд УОК салбар бүрт үүрэг өгч, ажиллаж байна. Оношилгоо эмчилгээний чиглэлээр туршлага судалж байна. ДЭМБ-ын зургаан хүний бүрэлдэхүүнтэй зөвлөх баг манай улсад ажиллаж байгаа. Өнөөдрийн хурлаар иргэдийг тусгаарлах журам батлах үүргийг Эрүүл мэндийн яаманд өгсөн. Оношлууртай холбоотой асуудлаар БНСУ, Япон улстай ажиллаж байна. Мөн энэ чиглэлээр ЭМЯ-наас ОХУ-д ажиллаж байгаа баг давхар судалгаа хийж байгаа” гэлээ.

Зам, тээврийн хөгжлийн сайд Б.Энх-Амгалан “Монгол Улсаас гадагш явдаг нислэгийг гуравдугаар сарын 11-ныг хүртэл зогсоосон байсан. БНСУ-Монгол-БНСУ, Япон-Улаанбаатар-Япон, Улаанбаатар-Улаан-Үд чиглэлийн олон улсын нислэгийг гуравдугаар сарын 28-ныг хүртэл буюу өвлийн нислэгийн цагийн хуваарь дуустал нисгэхгүй байх шийдвэр гаргалаа.

Нүүрс, газрын тосны экспортыг эхлүүлэх эсэх асуудалтай холбоотойгоор дахин мэдээлэл хийнэ. Европын нислэгийн асуудлын хувьд Туркиш эйрланс болон Москвагаар дамжин Герман руу гарч буй нислэгт онцгой анхаарч байна. Энэ чиглэлээс гуравдагч орны иргэнийг оруулахгүй байх, Гадаад яам энэ чиглэлд виз олгохгүй байх чиглэл өгсөн. Хэрвээ энэ чиглэлд нөхцөл байдал хүндэрвэл энэ чиглэлийн нислэгийг зогсоох эсэхийг Улсын онцгой комиссын хурлаар шийднэ.

Хүнс хөдөө аж ахуй, хөнгөн үйлдвэрийн сайд Ч.Улаан "Коронавирусийн тархалт эгзэгтэй байдалд шилжиж байна. Монгол Улс 3-4 сар дотоодын хэрэгцээгээ хангах шаардлагатай байна. Одоогоор махны 12 мянган тонн нөөц байна. Махны нөөцийг нэмэгдүүлэх боломжтой бөгөөд өдөрт 100 тонн нөөцийн мах хэрэглэх боломжтой байна. Өнгөрсөн жил 60-70 тонн мах нийлүүлж байсан. Мах бэлтгэн нийлүүлэх 60 гаруй аж ахуйн нэгж 12 мянган тонн махыг экспортлохоор бэлдсэн байсан нь  чанарын шаардлага хангаагүй болохоор дотоодын зах зээлд борлуулахаар болсон" гэдэг мэдээллийг өглөө.

Харин ОБЕГ-ын штабын дарга, бригадын генерал Г.Ариунбуян Шинэ коронавирусийн халдвараас урьдчилан сэргийлэх ажилд иргэд, байгууллагын ирүүлсэн хандив нэг тэрбум төгрөгт хүрснийг хэллээ. Тэрбээр "Энэ мөнгийг халдвартай тэмцэхэд ажиллаж буй ажилчид, алба хаагчдын тусгай хамгаалалтын хувцас хэрэглэл, шаардлагатай бүтээгдэхүүн авах, илүү цагийн хөлсөнд зарцуулна" гэдгийг онцлов.

Улсын онцгой комиссоос гарсан шийдвэрийн хүрээнд:

1. БНСУ, Япон улстай хийдэг нислэгүүдийг болон Эрхүү, Улаан-Үдтэй хийдэг нислэгүүдийг зогсоосон хугацааг 16 хоногоор нэмж гуравдугаар сарын 28 хүртэл сунгалаа.

2. Европоос ирэх гадны зорчигчдыг виз олгохгүй байх, нэвтрүүлэхгүй байх хязгаарлалтыг авахаар боллоо. Учир нь европын 41 улсад халдвар тархаад байна.

3. Маргаашнаас нөөцийн махыг худалдаанд гаргана. Өдөрт 100 тн махыг 279 цэгээр нийлүүлнэ. Улаанбаатарын хүн амын махны хэрэглээ өдөрт 120 тн байдаг. Ингэж тооцвол 4 сарын турш буюу долдугаарсард шинэ мах гартал нөөцийн махны тогтвортой нийлүүлэлтийг хангалаа.

Түүнчлэн хувийн хэвшлүүдийн бэлдсэн 10 мянган тн махыг дотооддоо нийлүүлнэ. Үр дүнд нь махны үнэ хямдрах нөхцөл бүрдэж байна. Гурилын нөөц мөн ханаглттай байна. Стратегийн гол хүнсний бүтээгдэхүүнийг албан татваргүй, НӨАТ-гүйгээр импортолно.

С.Сүлд