МАН-ын Удирдах зөвлөл өнгөрсөн баасан гарагт хуралдаж хэд хэдэн асуудлыг хэлэлцжээ. Хэлэлцсэн асуудлын нэг нь шинэ төрлийн коронавирусний тархалттай холбогдуулж тогтоосон онц дэглэмийн үеэр ёс зүйн зөрчил гаргасан Нарийн бичгийн дарга Ц.Бат-Энхэд хариуцлага тооцох тухай байв. Улмаар Удирдах зөвлөлийн шийдвэрээр төрийн шийдвэрийг үл хүндэтгэж, ёс зүйгүй авирласан Ц.Бат-Энхийг ойрын хугацаанд чөлөөлж, орных нь хүнийг томилох үүргийг Ерөнхий нарийн бичгийн дарга Д.Амарбаясгаланд өгчээ. Өөрөөр хэлбэл, Ц.Бат-Энхийг албан тушаалаас нь чөлөөлөхөөс гадна бусад асуудлын хүрээнд МАН-ын Бага хурлыг товлож, хуралдуулах нь цаг хугацааных болж байна.    

Удирдах зөвлөлөөр хэлэлцсэн өөр нэг асуудал нь УИХ-ын ээлжит сонгуульд өрсөлдөх нэр дэвшигчдийг тодруулах эсэх рейтингийн судалгааг тодорхой болгохыг МАН-ын удирдлагуудад өгсөн бололтой. Хуульд зааснаар нэр дэвшигчид тавдугаар сарын 16-наас тодорч эхэлнэ. Үүнтэй холбогдуулж, “УИХ-ын сонгуульд нэр дэвшигчдээс нэг ч төгрөгийн хандив авахгүй. Гэхдээ нэр дэвшигчдэд ёс зүйн болон олон нийтийн дундах рейтингийн шалгуур тавина" гэдгээ МАН-ын дарга, Ерөнхий сайд У.Хүрэлсүх өнгөрсөн нэгдүгээр сард мэдэгдсэн удаатай.

Сонирхолтой нь, УИХ-ын ээлжит сонгуульд нэр дэвших боломжгүй болсон хүмүүсийн нэр бүхий жагсаалт гарсан тухай мэдээлэл гараад байна. Санаж байгаа бол У.Хүрэлсүхийн Засгийн газрыг огцруулах эсэх асуудлыг чуулганаар хэлэлцэх үеэр “Намаас хөөх хүмүүсийг би шийдэхгүй, Хяналтын хороо шийднэ. Хасах хүмүүсийн жагсаалтыг би гаргана. Би төрдөө, намдаа их цэвэрлэгээ хийнэ” хэмээн Ерөнхий сайд У.Хүрэлсүх мэдэгдэж байв.

Түүнээс хойш МАН доторх зөрчил харьцангуй намжсан ч УИХ-ын сонгуультай холбогдуулж гаргасан гэх нэр дэвшигчдийн “хар жагсаалт” олон нийтэд ил болсон өдрөөсөө дахин маргаан дагуулах нь ойлгомжтой. Харин хэзээ.

Олон нийтэд ил болсноос дурдвал Улсын ерөнхий прокуророос хүргүүлсэн саналын дагуу Н.Номтойбаяр гишүүний бүрэн эрхийг түдгэлзүүлж шалгуулж эхлээд буй. Үүнээс гадна ЖДҮ, концессээс эхлээд сонгогчдоос дэмжлэг хүлээж, рейтинг тогтоох судалгаанд доогуур эрэмбэлэгдэх магадлал нь өндөр гишүүн энэ парламентад ганц нэгээр тогтохгүй олон.

Г.Эрхэс