АН-ын дарга С.Эрдэнэ төрийн дээд шатны алба хаагчдын цалинг 279-450 мянган төгрөгөөр нэмсэн байна. Гэтэл төрийн үйлчилгээний алба хаагчдын цалин ийм хэмжээгээр нэмэгдсэнгүй. Ингэж болохгүй ээ. Төрийн алба түргэн шуурхай байх, хүртээмжтэй байх ажлыг төрийн үйлчилгээнийхэн буюу онцгой нөхцөлд ажилладаг эмч, багш, онцгой байдал, цагдаагийнхан хийдэг. Гэтэл дарга нарын цалин, хөлсийг л нэмэх юм. Үүнээс гадна “Тавантолгой” ХК-ийн 30 хувийг худалдах, арилжаалах асуудлыг Их хуралд танилцуулахдаа 3-5 тэрбум ам.долларын IPO гаргах замаар хөрөнгө босгоно гэж байсан. Гэтэл нэг тэрбум ам.доллараар зарах тухай УУХҮ-ийн сайд ярилаа. Ингэж болохгүй. Тиймээс Их хурлаар энэ асуудлыг оруулах ёстой. УИХ-ын Дэгийн тухай хуульд нэмэлт өөрчлөлт оруулах замаар энэ асуудлыг шийдэх ёстой. “Тавантолгой” ХК ашигтай ажиллах боломжтой. Гэтэл ордын үнэ цэнийг алдагдуулж, зарах гэсэн явцуу бодолтой хүмүүс байна. Зарах асуудлыг АН зөвшөөрөхгүй. Хүмүүс IPO гаргаад нээлттэй компани болчихно гэж бодож байна. Заавал зарж, үрэхгүйгээр өөрийнх нь бодит боломжоор ашигтай ажиллах боломж бий. Жилд 1-2 их наяд төгрөгийн ашигтай ажиллаж байна. IPO хийх замаар хөрөнгө босгоод тэрүүгээр нь юу хийх гэж байгаа юм бэ. Юу хийх нь тодорхойгүй зөвхөн  зарчмын юм яриад байна.

Оюутолгой дээр ингэж л алдаа гаргаж байсан. Тухайн үед би ТЭЗҮ, эргэн төлөлтийн хугацаа хаана байна гэж зөндөө асуусан. Хэн ч хариулаагүй. Эцэстээ алдаа боллоо гэсэн. Тиймээс Их хурлаар энэ асуудлыг шийдэх ёстой.

Сонгууль дөхөөд ирэхээр бусдыгаа харлуулах байдал гаарах юм. Би хариуцлагатай хэлье. Өнөөдрийн байдлаар цагдаагийн байгууллагад мэдүүлэг тайлбар өгөөгүй. Надад үйлдсэн гэмт хэрэг байхгүй. Яллагдагчаар татагдаагүй. Их хуралд ийм бичиг ирээгүй. Прокурорын байгууллагаас ийм бичиг ирүүлээгүй. Намайг хоёр ч удаа яллагдагчаар татсан гэх мэдээлэл цацагдсан. Гэтэл бүгд ташаа мэдээлэл байсан. Намайг хэнд хэдэн төгрөгийн хохирол учруулсныг нотлох баримт гаргаад ир. Чаддаг юм бол. Тэгвэл би шалгуулахад бэлэн байна.

Төрийн өндөр албан тушаал хашиж байсан АН-ын гишүүдийг харлуулах гэсэн, хууль бус үйлдэл гаргахгүй байхад анхаарах хэрэгтэй. Ц.Элбэгдорж 2009 онд АН-аас түдгэлзсэн. Нам бус хүн. Гэтэл ЗГХЭГ-ын дарга Л.Оюун-Эрдэнэ “АН-ынхан зугтаагаад явсан Ц.Элбэгдорж, Ч.Сайханбилэгээ олж ир” ч гэх шиг. Хууль хяналтын байгууллагын ажлыг яахаараа улс төрийн намаар гүйцэтгүүлэх гээд байгаа юм бэ. Л.Оюун-Эрдэнэ ээ, уучрлаарай. Манай нам бол хууль дээдэлдэг нам шүү. Зугтсан гээд байгаа тэр хүнийг чинь улс төрийн нам эрэн хайдаггүй юм. Үүрэг нь эрх барьж байгаа нам, хууль хяналтын байгууллагад байдаг юм. Юм аа мэдэж ярь.

Ч.Сайханбилэгийн хувьд намын гишүүн хүн мөн. Гэхдээ түүнийг мөрдөж мөшгидөг нь бид биш. Намын хяналтын хороо хэн нэгэн гишүүний гомдлоор шалгадаг.

Ц.Элбэгдорж гэдэг хүнийг АН-д наахаа боль. Төрийн хүн, төрийн тусгай хамгаалалтад байдаг хүн. Хаана байгааг нь төрийн тусгайгийнхан мэдэх ёстой. Би тэгж бодож байна.

Бид хэн нэгний гэм буруутайг шалгадаг газар биш. Ч.Сайханбилэг нарыг шалгах ёстой бол шалга. АН-хан л гэх юм. Тэгвэл МАН-ынхан ЖДҮ-чин гишүүдээ яагаад шалгахгүй байгаа юм бэ. Яагаад хариуцлага тооцохгүй байгаа юм бэ. Бодит зүйлээ ярь л даа. Аль нэг намыг гишүүнээр нь ялгаварлахаа боль. Эрх баригч нам нь МАН биз дээ. Тэд ажлаа хийх ёстой.

Генерал Б.Хурцыг манай намаас нэр дэвших тухай яриа гарсан. Намын төлөөллийн төв байгууллагын шийдвэрээр гишүүнчлэлийн урьдчилгаа татвараа авдаг, авсан. Түүнээс биш сонгуульд өрсөлдөх эрх зараагүй. Аудитын байгууллагад шалгуулсан. Б.Хурц, Ц.Элбэгдорж зэрэг хүмүүсийн хүүхдүүд мөнгө төлөөд нэр дэвших гэж байгаа гэнэ үү. Тийм зүйл байхгүй. За байлаа гэж бодоход ЗГХЭГ-ын дарга Л.Оюун-Эрдэнэ яасан сайн мэдэх юм бэ. Хэрвээ үнэхээр ийм зүйл болсон бол намын дотоод асуудал биз дээ. Биднийг тагнадаг юм уу.

Б.Хурц гэдэг хүн нэг ч төгрөг өгөөгүй. Намын аль ч шатанд нэр дэвших тухай яригдаагүй.

ЗГХЭГ-ын дарга Л.Оюун-Эрдэнийг шалгуулна. Ямар эх сурвалжаас ийм мэдээлэл аваад нийгэмд цацаж байгаа юм бэ. Намын нууцтай хобоотой асуудлыг олон нийтэд удаа дараа цацсан.

Манай санхүүгийн албаны дарга Чулуунчимэг гэж бий. Сахал Д.Эрдэнэбилэгийн эхнэр гэж хүн манай намд ажилладаггүй.

Манай охин Хөгжлийн банкнаас нэг ч төгрөгийн зээл авч үзээгүй. Энэ банк хувь хүнд зээл олгодоггүй. Миний охин хувьцаа худалдаж аваад дараа нь зарсан нь үнэн. Гэхдээ өөрийнхөө мөнгөөр. Хувьцаа худалдаж авах, зарах эрх хүн бүрт нээлттэй. Худал мэдээллээр хүн гүтгэдэгээ боль" гэлээ.

Г.Маргад