Шинэ төрлийн коронавирусний шинж тэмдэг Франц Улсын иргэнээс илэрсэн билээ. Энэ дагуу Засгийн газрын хэвлэл мэдээлэл, олон нийттэй харилцах хэлстийн дарга Ц.Чинзориг мэдээлэл хийлээ. Тэрбээр "Тухайн Франц иргэний ирсэн газарт халдварын нэг шинж тэмдэг илэрсэн байсан. Тиймээс өөрийгөө тусгаарлах зөвлөмж өгсөн. Монголд ирсний дараа өөрийгөө нэг өдөр тусгаарласан. Үүний дараа гадуур гарсан байна лээ. Тухайн хүнтэй ойр байсан эхний 100 хүн цаашлаад 500 хүнийг хаяг, нэрсийг эхнээс нь тогтоосон. Нэр бүхий гурван ресторанаар үйлчлүүлсэн. 

Улсын онцгой комиссоос тухайн бүс нутагт голомлон тархаж байгаа таван бүс нутгаас ирсэн гадаад иргэдийг нэвтрүүлэхгүй байх, харин дотоодын иргэдийг нэвтрүүлээд 14 хоног тусгаарлах арга хэмжээ авч ирсэн. Франц улсын хувьд энэ хязгаарлалтад хамрагдаагүй байсан. 

Улсын онцгой комисст ард иргэд болоод аж ахуйн нэгжээс нэг тэрбум төгрөгийн хандив, тусламж ирсэн. 

Давхардсан тоогоор 4-2 сая гар утсанд урьдчилан сэргийлэх зөвлөмжийг хүргүүлэн ажиллаж байна" гэлээ. 

Үүний дараа сэтгүүлчдийн асуултад хариуллаа.

-Дэлхийн Эрүүл мэндийн байгууллагын төлөөлөгч энэ хүнтэй хамт ирсэн гэсэн. Мөн хоёр ч хүн орон нутагт сургалт хийж байгаа гэсэн. Эдгээр иргэдийг тусгаарлах уу?

-Дархан, Эрдэнэт зэрэг газарт тусгаарлалт хийсэн. Галт тэрэгний хөдөлгөөнийг зогсоосон. Тухайн өдөр 120 хүн онгоцоор ирсэн. Үүнээс 40 орчим хүнийг нэгдүгээр зэргийн хавьтал гэж үзэн тусгаарлаж, шинжилгээ хийж байна.

-Франц иргэнтэй нэгдүгээр зэргийн хавьталд орсон хэдэн хүнийг тусгаарласан бэ?

-Эхний ээлжинд 100 хүнийг тусгаарласан. Дам нөлөөгөөр харилцсан 500 хүний нэр, хаягийг тодорхой болгож байна.

-Тусгаарлах байрны хүрэлцээ хангамж тааруу байгаа гэсэн. 

-Онцгой комиссын хуралдаанаар энэ асуудлыг үе шаттай шийдэж байгаа. Энэ сарын 9-ний байдлаар 500 гаруй иргэнийг тусгаарласан байсан. Энэ тоо цаашид өсөх байх. Олон нийтэд уриалахад олон нийтийн газраар явахгүй байх, ариун цэврийг сайтар сахихыг сануулъя. Түүнчлэн онцгой нөхцөлд ажиллах алба хаагчдаас бусад иргэд цахим орчинд гэрээсээ ажиллахыг хичээх хэрэгтэй. Үүнийг төрийн байгууллагаас эхэлнэ. Хувийн хэвшил ч гэсэн энэ тал дээр анхаарах хэрэгтэй. Мөн ард иргэдээс нэг тэрбум орчим төгрөгийн хандив тусламж ирсэн. Үүнийг онцгой нөхцөлд ажиллаж байгаа алба хаагчдын аюулгүй байдалд зарцуулна.

Г.Маргад