Засгийн газрын шийдвэрийн талаар Сангийн сайд Ч.Хүрэлбаатар мэдээлэл хийлээ.

Тэрбээр “Эдийн засгийн талаар авч хэрэгжүүлэх бодлогын талаар Засгийн газар хуралдлаа. Хятадын талтай тохиролцож экспорт нэмэгдүүлэх асуудлыг шийдвэрлүүлсэн. У.Хүрэлсүхийн Засгийн газар байгуулагдсанаас хойш эдийн засгийн бодлогыг зөв явуулах талаар анхаарал тавьж ирсэн. Тухайлбалд, 2018 онд эдийн засаг 7.2 хувьд хүрэхэд төсөв ашигтай гарч байсан. Харин 2019 онд эдийн засгийн өсөлт 5.3 хувьтай байхад 600 тэрбум төгрөгийн төсвийн алдагдалтай баталж байсан. Хэдийгээр эдийн засгийг тэлэхэд өсөлт өндөр гарч байсан ч нөөц, хуримтлал бий болгохоор ажиллаж байсан. Өөрөөр хэлбэл, тодорхой хэмжээний мөнгийг хуримтлуулж байсан гэсэн үг.

Тодруулбал, Ирээдүй өв сангийн мөнгө 38 тэрбум төгрөг байсан бол өнөөдөр 620 орчим тэрбум төгрөг болсон байна. Мөн 8.2 их наяд төгрөгийн өр төлсөн. Юу гэхээр бид эдийн засгийн хүндрэл үүсэхэд даван туулах, болзошгүй нөхцөл байдал үүсэх үед зарцуулах, нөөцлөхөд анхаарч байсан. Энэ нь коронавирусний үед их хэрэг болж байна.

Түүнчлэн өнөөдрийн хуралдаанд Монголбанк болон Монголын арилжааны банкуудын холбооны тэргүүн оролцсон. Тэдний зүгээс аж ахуйн нэгжийн өмнө тулгамдсан асуудлаар зарим арга хэмжээ авахаар ярилцаж байна гэсэн. Тодруулбал, зээлийн хүүн дээр тодорхой хэмжээний өөрчлөлт оруулахаар ярилцаж байгаа юм байна. Удахгүй албажиж гарах байх. Үүнээс гадна Санхүүгийн зохицуулах хорооноос банк бус санхүүгийн байгууллагуудад хураамж, шимтгэл авахгүй байх, нэмэгдүүлсэн хүүг тэглэх, алданги тооцохгүй байх зэрэг асуудлаар томоохон банк бус санхүүгийн байгууллагатай хэлэлцэж байна. Энэ мэтчилэн яриа хэлцэлийн үр дүнд хямралыг даван туулахад бага боловч нэмэх болох байх” гэлээ.

Б.Лхам