АН нэр дэвшигчдээсээ авч буй 100 сая төгрөг тойрсон хэл ам тасраагүй байна. Саяхан энэ талаар тус намын дарга С.Эрдэнэ байр сууриа илэрхийлэхдээ ийм хэмжээний мөнгө аваагүй гэсэн юм.  

Тэгвэл “Хера холдинг” ХХК-ийн үүсгэн байгуулагч, улстөрч Хассуурийн Ганхуяг твиттертээ “С.Эрдэнэ даргын бухимдсан яриаг үзлээ. АН 100 сая төгрөг авч болохгүй шүү дээ. 60 тэрбумаас ялгаа юу байна аа. Хэлбэрийн хувьд л өөр болохоос агуулгын хувьд ялгаа алга. Төрийн эрхийг хууль бусаар авах гэсэн оролдлого биз дээ. Б.Хурц нараас мөнгө аваагүй нь үнэн юм бол дансаа ил болгочих” хэмээн жиргэжээ.

Хасуурийн Ганхуяг 2016 оны сонгуульд УИХ-ын сонгуулийн 70 дугаар тойрогт бие даан нэр дэвшиж байв.

Тэрбээр жил гаруйн өмнө “2020 оны сонгуульд АН-ын дарга С.Эрдэнийг амалж өрсөлдөх бодол бий. З.Энхболд, С.Эрдэнэ гээд Ардчилсан намын үе үеийн хоёр даргатай Баянголд хэнтэй нь ч халз өрсөлдөхөд бэлэн байна. Сонирхуулахад, сонгуулиар надад санал өгсөн сонгогчдын олонх нь Ардчилсан намын гишүүд байсан юм шүү. Энэ нь миний сайных гэхээсээ намын удирдлагынхаа мэдрэмжгүй, дарангуйлсан арга барил, үнэт зүйлийн зөрчлөөс зугтсан гишүүдийнх нь эсэргүүцлийн хэлбэр байсан гэж боддог” хэмээн мэдэгдэж байсан юм.

С.Сүлд