2017 оны долдугаар сарын 9. Энэ бол Монгол ялсан өдөр. Юу гэхээр Ерөнхийлөгчийн сонгуулийн үеэр Х.Баттулгыг ялалтад хүргэсэн гол зүйл нь “Монгол ялна” гэх лоозон байсан юм. Мөн тухайн үеийнхээ трэнд үг нь ч болж байсан удаатай. 

Тэгвэл энэ удаа ч Монгол ялахад ойрхон байна. Дэлхий нийтээр шинэ коронавирусний  халдвар тархаж эхэлсэн өнгөрсөн нэгдүгээр сарын 9-нөөс эхлэн манай улс 1200 гаруй иргэнийг тусгаарлаж, урьдчилан сэргийлэх арга хэмжээ авчээ. Мөн энэ өдрөөс л эхлэн бэлэн байдлаа хангаж эмч, эмнэлгийн байгууллага, цагдаа, онцгой байдлын газар, мэргэжлийн хяналтынхан бидний эрүүл мэндийн манааны төлөө ажилласан юм. Улмаар Монголчууд эвлэлдэн нэгдэж төр засгаас өгсөн үүрэг чиглэлийг хэрхэн биелүүлж, эрүүл мэндийнхээ төлөө хичээж чаддагийг сар шинийн баяраа “алгасаж” харуулсан. Учир нь сар шинийн баярыг өргөн дэлгэр тэмдэглэснээр аймшигт тахал болон хувирч, халдварыг дэлгэрүүлэхэд хүргэсэн урд хөршийн гашуун сургамжаас санаа авсан нь тэр.

Нэгдүгээр сарын 9-нөөс өнөөдрийг хүртэлх хугацаанд нэг ч монгол хүн халдвар аваагүй нь том амжилт. Гаднаас халдвартай иргэн нэвтрэхэд ч түргэн хугацаанд ажиллаж, халдварыг цааш тархахаас сэргийлж чадсан нь ч амжилт юм. Одоо дараагийн алхам бол Франц иргэнийг эдгээх.

Хэрэв үнэхээр франц эр эдгэрчихвэл, дээр нь халдвар цааш тархахаас урьдчилан сэргийлэх хамгаалалтаа сайн хийж чадвал нөгөө улстөрчдийн яриад байсан аялал жуулчлал, эдийн засгийн сэргэлт цаг хугацааны асуудал болно. 

Өнөөдрийн байдлаар халдвар дэлхийн 135 оронд бүртгэгджээ. Үүнээс Итали, Иран, Франц, АНУ зэрэг улсад голомтлон тархаж буй бөгөөд халдвар бүртгэгдээгүй байсан Казахстан улсад халдварын зургаан тохиолдол бүртгэгдэв. Өөрөөр хэлбэл, зөвхөн төрд тангараг өргөсөн тангарагтнууд нойр хоолгүй хичээж ажиллах үе биш хүн нэг бүрийн оролцоо чухал гэдгийг харуулж байна. Ядаж л маскаа зүүгээд, гараа ариутгаад, шаардлагагүй тохиолдолд гадуур гарахгүй байх нь өөрийгөө болон гэр бүлээ эрсдэлээс хамгаалж байгаа нэгэн хэлбэр юм.  

Эрүүл явахад ирэх жилийн наадам үзнэ, бид. Үүний тулд таны, бидний оролцоо маш чухал. Бид энэ удаад ч эвлэлдэн нэгдэж, хүчээ нэгтгэж чавдал Монголчууд жинхэнэ утгаараа ялахад ойрхон байна.  

Б.Лхам