Хэлсэн, хийсэн үйлдэл бүхэн нь трэнд болдог хүний нэг нь экс Ерөнхийлөгч Ц.Элбэгдорж. Фракц байгуулж хууль бус зүйл хийсэн, шударга бусын хонгилын эзэн зэргээр олон хэрэгт унаад буй тэрбээр "Хууль дуудвал гутлаа тослоод, зангиа зүүгээд очих ёстой" гэж хэлж хэлээд цахимаар зургаа цацаж, попорч байв.

Гэвч хууль түүнийг дуудах цагт тэр хэлсэн үгнээсээ буцаж, очсонгүй. Дэлхий даяар халдвар тархаж, толгойтой бүхэн эх нутаг руу зүтгэх тэр агшинд экс Ерөнхийлөгч ч гэсэн "Хурал чуулган цуцлагдчихлаа. Зорилтот бүлэгт нь багтаад оччих юмсан" гэж жиргэсэн нь хэдхэн хоногийн өмнөхөн.

Тэгвэл Л.Оюун-Эрдэнэ сайдын баталснаар Америкт өндөр үнэтэй тансаг зочид буудалд тансаглаж суусан тэрбээр Солонгост хэд хоногийн өмнө очсон гэнэ. Тэгэхдээ бүр "Эх нутагтаа очих хүсэлтэй байгаа" гэж жиргэсэн тэр үедээ шүү дээ. 

Түүнийг Солонгост очсоны дараа тусгай үүргийн онгоцоор элэг нэгтнүүдээ эх оронд нь авчрах болсон. Ингэхдээ тухайн иргэн өөрөө хүсэлт гаргаж, төлбөрөө төлсөн байх ёстой гэсэн шаардлага тавьсан. Үүнтэй зэрэгцээд экс Ерөнхийлөгчийг одоо л эргэж ирэх нь, хуулийн босгоор давах нь гэж олон хүн итгэж найдаж, суусан. Гэвч молги үмхүүлэхдээ гаргууд тэрбээр дахиад л биднийг молги үмхүүлчихэж. Учир юу гэвэл, БНСУ-д суугаа Элчин сайдын яаманд хүсэлт гаргаагүй бөгөөд бүр утсаар ч яриагүй гэнэ. 

Уг нь бол тэр ирэхийг хүсэж байна гэсэн. Гэвч эл үйлдлээс нь харвал ийм санаа огтхон ч байхгүй бололтой. Түүнийг хууль дуудсан. Түүнд гутлаа тослоод, зангиагаа зүүгээд ирэх боломж байсан. Харамсалтай нь, тэр Солонгост үлдэхийг илүүд үзэж. Олон Улсын хурал чуулган нь цуцлагдсан гэдгийг өөрийн цахим хуудастаа жиргэсэн тэрбээр ямар ажлаар Солонгост яваа нь бас л тодорхойгүй. Ийнхүү төрийн тусгай хамгаалалт дор улс дамнан тэнэж яваа тэрбээр хэзээ Монголдоо ирж, хуулийн босго давах нь бас л тодорхойгүй үлдлээ. 

Г.Маргад