Шинэ төрлийн коронавирусний халдвар тархсан энэ цаг үед улс орон эдийн засгийн хүнд байдалд орж, өрхийн орлого тасалдахад хүрээд байна. Тиймээс Засгийн газар, Монголбанкнаас иргэн, аж ахуйн эдийн засгийг дэмжсэн алхам яаралтай хийх хэрэгтэй. Тэр дундаа онц байдал зарласан энэ цаг үед татвар болон зээлийн хүүг хөнгөлж, чөлөөлөх замаар эдийн засгийг дэмжих хэрэгтэй гэдгийг ХҮН-аас мэдээллээ. 

Тодруулбал, "Халдварын улмаас эдийн засагт хүнд байдал үүсэх нь тодорхой болоо. Бид зөвхөн вирусний халдвартай тэмцэх бус эдийн засгийн хямралтай мөн адил цэмцэх ёстой. Тиймээс ХҮН-аас онц байдлын үед улсын төсөв, мөнгөний бодлого, нийгмийн хамгааллын салбар, бизнесийн орчинд тулгамдсан асуудлыг хэрхэн даван туулах талаар төлөвлөгөө гаргасан. Үүнийг УИХ, Засгийн газарт хүргүүлнэ.

АНУ бодлогынхоо хүүг тэг болголоо. Гэтэл манайх нэг хувиар бууруулж, 10 хувь болгосон. Бид яаралтай арга хэмжээ авах ёстой гэдгийг Их долоогийн уулзалт болон дэлхийн бусад орны авч хэрэгжүүлж байгаа шийдвэр баталж байна. Ийм арга хэмжээ авахгүй бол вирусний халдвараас илүүтэй иргэдийн амжиргаа дордож, санхүүгийн баталгаагүй болно. Үүнийг дэлхийн улс орнууд ойлгож, мэдсэн учраас тууштай арга хэмжээ авч байна. 

Гэтэл бид хэтэрхий назгай хандаж байна. Засгийн газар вирусний халдвартай сайн тэмцэж байна. Гэхдээ тахал байсан ч байгаагүй ч амьдрал үргэлжилдэгээрээ үргэлжилнэ. 

Коронавирусний халдварын энэ үед иргэн, аж ахуйн нэгжийн орлого тасалдах эрсдэл үүсээд байна. Тиймээс ядаж зургаан сарын хугацаанд эдийн засгийн хөшүүргэ, дэмжлэг авч хэрэгжүүлэх хэрэгтэй. Үүнд жижиг дунд бизнесийнхэн орлогын албан татвьараа төлөх хугацааг хойшлуулах хэрэгтэй байна.

Мөн нийгмийн даатгалын шимтгэлээ төлж чадахгүй байх, хоцрох тохиолдол үүсэх нь ойлгомжтой боллоо. Тиймээс нөхөж төлөх боломжийг бүрдүүлэх ёстой. Үүнийг Засгийн газраас шийдвэрлэх хэрэгтэй. Ажилгүйдлийн даатгалаас тэтгэмж авахын тулд сүүлийн есөн сарын хугацаанд нийгмийн даатгал төлсөн байх шаардлага тавьдаг. Энэ хугацааг зургаан сар болгож өөрчлөх хэрэгтэй. 

Орлогогүй иргэд линзингээ яаж төлөх юм бэ. Тиймээс Монголбанкнаас арилжааны банкуудтай хорио цээрийн үед зээлийн үндсэн төлбөр болон зээлийн хүүг хойшлуулах талаар нэг шийдэлд хүрмээр байна. Орлогогүй иргэд яаж зээлээ төлөх юм бэ. Тиймээс Засгийн газар бидний боловсруулсан төлөвлөгөөг дэмжих хэрэгтэй. УИХ, Засгийн газарт хүргүүлнэ. Үүнд улс төржих шаардлага байхгүй гэдгийг уриалмаар байна. Монголчууд аа, хямралыг хамтдаа даван туулъя" гэлээ.

Г.Маргад