УИХ-ын сонгууль айлсах тусам нэр дэвших сонирхолтой горьлогчид хөдөлгөөнд орж эхэллээ. Тэдгээрийн нэг нь "Хера Холдинг" компанийн захирал Хассуурийн Ганхуяг. Түүний хувьд 2016 оны сонгуулиар Баянгол дүүрэгт нэр дэвшсэн ч өвдөг шороодсон. Харин энэ удаад дахин нэр дэвших сонирхлоо эртнээс илэрхийлж, түүнийгээ идэвхжүүлж эхлээд байгаа юм.

Сонирхолтой нь, өмнөх сонгуулиар УИХ-ын дарга асан З.Энхболдын нэр дэвшсэн 70 дугаар тойрогт өрсөлдсөн Х.Ганхуяг ирэх сонгуулиар АН-ын дарга С.Эрдэнийг амлан авч өрсөлдөхөө илэрхийлээд байна.

Энэ талаараа тэрбээр "З.Энхболд, С.Эрдэнэ гээд Ардчилсан намын үе үеийн хоёр даргатай Баянголд халз өрсөлдөхөд бэлэн байна" хэмээн ярьж байсан удаатай. Улмаар Би Ардчилсан Намын даргыг амалж өрсөлдөнө хэмээн мэдэгдсэн. Үүнийхээ илрэл болгож Х.Ганхуяг АН-ын нэр дэвшигчдээсээ авч 100 сая төгрөгтэй холбоотой шүүмжлэлийг, Намын дарга С.Эрдэнэтэй холбон ойрмогхон дайх болжээ. Хамгийн сүүлд "АН-ын дарга С.Эрдэнийн УИХ-д нэр дэвшигчдээсээ авч буй 100 сая төгрөг 60 тэрбум-ын схемтэй ижилхэн гэж бодож байна уу?" гэсэн санал асуулгыг цахим хуудсаараа дамжуулан явуулж эхэлжээ.

Эндээс Х.Ганхуягийн энэхүү үйлдэл "Саваагүй нохой саранд хуцна" хуцна гээчийн үлгэр шиг харагдаж байна. Ер нь АН сонгуульд нэр дэвшигчдээсээ 100 сая төгрөг авна уу, 100 төгрөг хураана уу, тэр нь Х.Ганхуягт огтхон ч падлий байхгүй. Тэгээд ч дэлхийн аль ч улсад хандивгүйгээр сонгууль болдоггүй. Жишээ нь, АНУ-ын Ардчилсан нам тодорхой хугацаанд цуглуулах мөнгөний босго тавьж, тэр нь сонгуулийн дараагийн шатандаа орох шалгуур болдог. Нэг үгээр тухайн нэр дэвшигчийг хандиваар өгч дэмжсэн хүн байхгүй бол жинхэнэ сонгуульд өрсөлдөхдөө амжилт гаргаж чадахгүй гэж үздэг. Үүнийг Х.Ганхуяг захирал эрх биш мэдэж л таараа.

С.Сүлд