УИХ-ын 30 гаруй гишүүдэд ЖДҮХС-гийн нийт 8.6 тэрбум төгрөгийг халааслах боломжийг олгосон гэх хэрэгт унаад буй сайд асан Б.Батзориг нарт холбогдох хэргийн шүүх хурал болох гэж байна.

Шүүх хурал Баянзүрх дүүргийн Эрүүгийн хэргийн анхан шатны шүүхэд 10.00 цагаас болох бөгөөд одоогоор хуралдаан хойшлуулах эсэх ямар нэгэн санал хүсэлт ирээгүй байгаа аж.

Хэрвээ шүүх хурал товлосноороо болж түүнд ял оноовол УИХ-ын нэр бүхий гишүүд албаны эрх мэдлээ урвуулан ашиглаж ЖДҮХС-д гар дүрсэн болох нь батлагдах талтай. Дагаад МАН-ын ирэх сонгуулийн өнгийг тодорхойлох, хөшигний ар дахь эзэд тодрох гээд ихээхэн ач холбогдолтой шүүх хурал болох юм.

Харамсалтай нь, коронавирусний дэгдэлт дэлхий нийтийг чичрүүлж, тэр дундаа өнөөг хүртэл тэсч ирсэн монголчуудын дунд гурван халдвар тээгч бий нь хэдийнэ батлагдсан. Ийм цаг үед шүүх хурал хойшлогдох магадлал тун их юм.

Нөгөөтээгүүр, эрх баригч намын даалгавраа биелүүлсэн сайд, сайдынхаа даалгаврыг биелүүлсэн алба хаачдыг шүүхийн босго давуулсан нь өөрөө шударга бус явдал гэж зарим иргэд үзэж буй. Нэг талаас нь харахад тийм. Гэхдээ том агуулгаар нь аваад үзвэл, том чулууг жижиг чулуугаар цохиж унагахтай ялгаагүй зүйл юм.

Тиймээс Б.Батзориг тэргүүтэй хүмүүс шүүх дээр унаж байж л ЖДҮ-чин гишүүд хуулийн босго давах эхлэлийг тавих голдирол таваигдах нь ойлгомжтой зүйл юм.

Ташрамд дурдахад, тэрбээр хамгийн өндөр үнэтэй газартай улстөрчөөр цагтаа тодорч байсан удаатай. Тодруулбал, 2014-1017 онд 2.4-1.3 тэрбум төгрөгийн үнэ бүхий газартай байсан гэж АТГ-д мэдүүлж байжээ.

Г.Маргад