Баян-Өлгий аймгийн Онцгой комисс өчигдөр 02:00 цагт хуралдаж, халдвар бүртгэгдсэн Казахстан улсаас Цагааннуурын хилийн боомтоор нэвтэрсэн Монгол Улсын иргэн бүрийг тусгаарлаж ажиглалтанд авах, эдгээр иргэдийг тогтмол эрүүл мэндийн хяналтанд байлгах, төрийн ба төрийн бус хувийн хэвшлийн эмнэлэг, сувилал, сургуулийн дотуур байр зэрэг барилга байгууламжийг шаардлагатай тохиолдолд тусгаарлан ажиглалтанд авах байр болгон ашиглах, бэлэн байдлыг хангах, 20 мянган ширхэг амны хаалт нөөцлөх зэрэг шийдвэр гаргасан.
Учир нь энэ сарын 10-наас улсын хэмжээнд агаарын болон автозам, төмөр замын хөдөлгөөнийг хаах шийдвэрийг Улсын онцгой комисс гаргасан юм. Гэвч хорио цээрийн дэглэм тогтоосон энэ үед Баян-Өлгий аймгийн Цагааннуур боомтоор Казахстанаас нэр бүхий иргэд ирсэн, тэдгээрийн нэгнээс нь сэжигтэй тохиолдол илэрсэн учир тусгаарлах арга хэмжээ авсан талаарх мэдээлэл цацагдсан юм.
Тэгвэл аймгийн Засаг дарга А.Гылымхан өнөөдөр Дербес телевизид дараах тайлбарыг өглөө.
Тодруулбал, "Нэгдүгээр сарын 27-ний өдрөөс аймгийн онцгой комисс шуурхай ажиллаж байна. Өнөөдрийн байдлаар 192 иргэн тусгаарласан. Энэ сарын 14-нд Казахстанаас 59 иргэн ирсэн. Энэ үед тухай улсад халдвар бүртгэгдээгүй байсан. Тэдгээрийг гэрт нь тусгаарласан. Энэ хугацаанд дөрвөн сэжигтэй тохиолдол илэрсэн. Тухай бүрт шинжилгээ авсан. Бүгд халдваргүй болох нь батлагдсан. Тусгаарлагдсан нэг иргэний шинжилгээ сөрөг гарсан. Манай аймаг хамгийн эрсдэлтэй бүлэгт хамаарч байгаа. Учир нь ОХУ, Казахстанаас олон хүн ирж байна. Өнөөдөр гэхэд 200 хүн хилээр орж ирлээ.
Нөгөөтээгүүр, гаднын иргэдийг улсын хилээр чөлөөтэй гаргаж байна. Казахстанд 800 гаруй оюутан, ажлаар 400 гаруй хүн, замд цөөнгүй хүн яваа. Шатахуун тээвэрлэлт хэвийн үргэлжилж байна.
Урьдчилан сэргийлэх үүднээс хот хооронд болон сум хоорондын хөдөлгөөнийг хорьсон. Учир нь сэжиг илэрсэн иргэний давтан хариу гартал хязгаарлалт тогтоосон. Аймгийн хэмжээнд 192 хүн тусгаарласан. Мэргэжил сургалтын төвд 20 ор бэлдсэн байсан. Дээрх иргэдээс 20 хүнийг нь энд байршуулсан. Энэ сарын 16-ний өдөр улсын хилээр орж ирсэн хүмүүс дундаас нэг хүн халуурах шинж тэмдэг байсан. Энэ хүнийг эмнэлэгт тусгаарласан.
Мөн ахлах сургуулийн байранд хүмүүс тусгаарласан. Төрийн бус байгууллагын шинэ барилгад 100-гаад ор бэлдэж, үлдсэн хүмүүсээ тусгаарласан. Тусгаарласан иргэдээс тусгаарлах мөнгийг өөрсдөөс нь гаргуулах ёстой. Гэхдээ манай аймгийн хувьд зарим иргэнийг үнэгүй байршуулсан. Цаашид зочид буудал болон Монгол-Туркийн сургуульд байршуулна.
Өнөөдрөөс ОХУ хилээ хаах шийдвэр гаргаж байгаа юм шиг байна.
Халдварын сэжиг илэрсэн иргэнээс авсан шинжилгээний сорьцийг газраар явуулж байгаа. Учир нь онгоцоор сорьц явуулахгүй гэсэн журам байдаг юм байна" гэлээ.
Г.Маргад
Сэтгэгдэл (5)