Нийслэлийн Засаг дарга бөгөөд Улаанбаатар хотын захирагч С.Амарсайханы захирамжаар Сүхбаатарын талбайн өмнөх Хонхтой цэцэрлэгт хүрээлэнгийн тохижилтийг өөрчилж, 3.2 тэрбум төгрөгөөр усан оргилуур бүхий тохижилтыг шинээр хийхээр болсон юм. Уг ажлын бэлтгэл ажил энэ сарын 1-ээс эхэлж, тохижилтын зарим хэсгийг буулгаж эхэлсэн.

Уг үйлдлийг эсэргүүцсэн иргэн Ж.Энхбат өнөөдөр байр сууриа илэрхийллээ. Эдгээр иргэдийн хувьд "Улс орны эдийн засаг хүндэрсэн ийм үед 3.2 тэрбум төгрөгөөр тохижилт хийх нь илүүц ажил. Уг нь тэвчиж болох зардлаа танахыг Засгийн газраас анхааруулсан. Гэтэл хотын зүгээс ийм үрэлгэн зангаж болохгүй. Коронавирусний халдварын тархалт хэчнээн хугацаанд ч үргэлжилж мэднэ. Тиймээс санхүү төсвөө сайтар тооцох ёстой. Нөгөөтээгүүр, ногоон байгууламж устах нь зүйд нийцэхгүй. Би улс төр хийгээгүй. 3.2 тэрбум төгрөгөөр гурван цэцэрлэг барих боломжтой. Зүгээр байгаа талбайн тохижилтыг устгаж, ийм их мөнгө үрэхээ боль" гэлээ.

Харин зураг төслийг гүйцэтгэхээр нийслэлийн Хот тохижилтын газар шалгарсан бөгөөд тэдний зүгээс "Бид орчин үеийн стандартад нийцсэн, дэлхийн жишигт хүргэсэн байдлаар тохижилт хийнэ" гэдгийг хэлсэн юм.

Мөн НЗДТГ-аас "Сонгууль дөхөхөөр хүн бүр улс төр хийх гэдэг боллоо. Бид олон нийтээс санал асуулга асуусан. Ингэхэд ногоон байгууламж хэлбэрээр тохижуулах ёстой гэсэн санал ирсэн. Сонгон шалгаруулалт зарладах 16 бүтээл шалгарч, эцсийн шатанд үлдсэн бүтээлийн зураг төслөөр тохижилт хийхээр болсон. Кадастрын зургаар ногоон байгууламжийн 25 орчим хувийг нь зөөвөрлөөд эргээд суулгана. Бид зогсоол байгуулах гээгүй. Харин цэцэрлэгт хүрээлэн байгуулна. Оны өмнө төсөвт санхүүжилт суусан. Хуулийн дагуу гүйцэтгэж байгаа ажил" гэдэг тайлбар хийлээ. 

Албан хүмүүсийн талбарласнаар Сүхбаатарын талбайн урд хэсэг буюу 1.6 га талбайд 85 метр урт, 14 метрийн өргөнтэй аялгуут усан оргилуур, 800 кв.метрийн хэмжээтэй дугуйн талбайтай, 35 хүнд нэг дор үйлчлэх боломжтой хоёр ариун цэврийн байгууламж барихаас гадна иргэдийн амарч, зугаалах орчныг бүрдүүлэх тохижилтуудыг хийхээр зураг төсөлд тусгасан. Шилмүүст мод тарихаас гадна автомат усалгааны систем байршуулж, 24 цагаар ажилладаг гэрэлтүүлэг зэргийг суурилуулах юм байна.

Дэд бүтцийн ажлыг мэргэжлийн байгууллагуудтай хамтран хийх бөгөөд бүтээн байгуулалтын ажлыг 24 цагаар шахуу хийхээр төлөвлөжээ. 3.2 тэрбум төгрөгөөр цэцэрлэгт хүрээлэнг тохижуулах бөгөөд тендер зарлалгүй Нийслэлийн Хот тохижилтийн газар шууд гэрээ байгуулан ажиллах юм.

Г.Маргад