Оюутолгойн гэрээнээс болж олон Засгийн газар шүүмжлүүлэх болоод байна. Бас олон хүн энэ орд газраас болж албан тушаалаасаа салах учиртай аж. Өмнө нь Ерөнхий сайд асан С.Баярыг Оюутолгойн гэрээг хийлээ гэж шахсаар албанаас нь салгах нэг үндэслэл болсон. Дараа нь С.Батболд ч огцрохын даваан дээр Оюутолгойн гэрээнд зарим нэг өөрчлөлт оруулаад тогтож үлдсэн юм. Харин ЭБЭХ-ний сайд асан Д.Зоригт Оюутолгойн гэрээнээс болж гурван удаа огцруулах мэдэгдэл авч байсан юм.

  Харин одоо Оюутолгойн асуудал дахин сөхөгдлөө. УИХ-ын гишүүн Б.Бат-Эрдэнэ, Р.Амаржаргал, О.Баасанхүү, С.Ганбаатар, Г.Уянга, Д.Батцогт, Ц.Даваасүрэн, Х.Болорчулуун тэргүүтэй 23 гишүүн сүүлийн нэг сарын хугацаанд ярилцаж байгаад Оюутолгойн гэрээнд нэмэлт өөрчлөлт оруулахыг Ерөнхий сайдаас шаардлаа. Тэд энэ асуудлыг 10 сарын 5 дотор судалж хариу өгөхийг хүссэн юм.
   Угаасаа ард түмэнд ашиггүй байгуулагдсан энэ гэрээнд нэмэлт өөрчлөлт оруулахыг олон түмэн шаардсаар ирсэн. Ийм шаардлага тавьсан хүмүүс тэгсхийгээд л чимээгүй болчихдог. Шалтгаан нь тодорхойгүй. Манай олон нэртэй сэтгүүлчид Оюутолгойн гэрээг хамгаалж, өмгөөлөөд байдаг шалтгааныг УИХ-ын гишүүд бас ярилцсан байна. Тиймээс цаашид Оюутолгойн санхүүг ил тод байлгах, монголын талын оролцоог 51 хувьд хүргэх, усны төлбөр төлдөг болгох зэрэг шаардлагыг эхний ээлжинд тавихаар болжээ.

  Хэрэв Н.Алтанхуягийн Засгийн газар Оюутолгойн гэрээнд нэмэлт өөрчлөлт оруулж чадахгүй бол яах вэ? гэдэг асуудал гарч ирнэ. Энэ асуудлыг УИХ-ын шаардлага тавьж байгаа гишүүд өөр хоорондоо бас ярилцсан байна. Тэгээд тэд энэ гэрээнд өөрчлөлт оруулж чаддаг Ерөнхий сайдтай болох хэрэгтэй, Монголынхоо эрх ашгийг хамгаалдаг Засгийн тэргүүнтэй байх арга хэмжээ авна гэж тохиролцсон хэмээн эх сурвалж мэдээллээ. Өөрөөр хэлбэл Н.Алтанхуягийг Оюутолгойн гэрээнд нэмэлт өөрчлөлт оруулж чадахгүй бол огцрох ёстой гэсэн дараагийн шаардлагыг нэр бүхий гишүүд тавихаар бэлтгэж байгаа гэнэ. Ийнхүү Н.Алтанхуягийн хувь заяа Оюутолгойгоос бас шалтгаалах боллоо.

   Хамгийн ноцтой нь УИХ-ын 23 гишүүн шаардлага тавина гэдэг бол нилээд эвгүй нөхцөл байдлыг үүсгэж байгаа гэсэн үг юм. Гарын үсгээ зураагүй ч гэсэн “Та нартайгаа хамт байгаа шүү, чуулган дээр дэмжинэ ээ” гэсэн гишүүдийн тоо арав гарсан сурагтай. Өөрөөр хэлбэл одоогийн байдлаар Оюутолгойн гэрээнд нэмэлт өөрчлөлт оруулахыг УИХ-ын 30 гаруй гишүүд дэмжиж эхэлжээ. УИХ-ын тал нь гэсэн үг. Байдал улам л эгзэгтэй болж байгаагийн илэрхийлэл.   
   Нэг зүйлийг онцлоход Оюутолгойн асуудлаар зөвхөн сөрөг хүчнийхэн биш бүх намын гишүүд үзэл бодол, байр сууриа нэгтгэж байгаа нь анхаарал татаж байна. Өөрөөр хэлбэл Оюутолгойн гэрээнд нэмэлт өөрчлөлт оруулъя гэдэг шаардлага тавиад буй 23 гишүүний дотор АН, МАН, МАХН, МҮАН болоод бие даагч гээд парламент дотор байгаа бүхий л төлөөлөл багтаж байна.
Угаасаа Оюутолгойн гэрээг ард түмний эрх ашигт нийцээгүйг олон баримтаар нотолдог. Ганцхан жишээ хэлэхэд Оюутолгойн орд газар усны нөөц багатай говь нутагт байрлалтай. Өдөр бүр асар их ус хэрэглэдэг. Тэгсэн мөртлөө өдөрт ямар хэмжээний ус хэрэглэсэн нь тодорхойгүй байдаг. Хамгийн гол нь усны мөнгө төлдөггүй. Гэтэл Улаанбаатарын гэр хорооллын иргэд 1 литр усны мөнгө гэж хоёр төгрөг төлдөг. Энэ шударга явдал мөн үү гэж эрхэм гишүүн Г.Уянгыг асуухад хүргэсэн биз. Энэ мэт шударга бус олон зүйл заалтыг Оюутолгойн гэрээнээс олж харж болно.

  Ийнхүү бүх намын төлөөлөл нэгдсэн 23 гишүүн Оюутолгойн гэрээнд нэмэлт өөрчлөлт оруулахыг шаардлаа. Үр дүнд нь Оюутолгойн гэрээнд нэмэлт өөрчлөлт оруулж, хөрөнгө оруулагчид үйл ажиллагаагаа татна гэсэн томоохон мэдэгдэл маргаан өрнөж мэдэхээр боллоо. Үүнээс гадна Оюутолгойгоор дамжуулан Н.Алтанхуягаар туг тахих гэсэн давхар улс төр ч явагдаж эхэллээ.