УИХ-ын Дэгийн тухай хуульд орсон нэмэлт, өөрчлөлтийн талаар УИХ-ын гишүүн Д.Лүндээжанцан мэдээлэл хийлээ.
Тэрбээр "Дэлхий нийтэд үүссэн асуудалтай холбогдуулан зарим орнуудын парламент онлайн хэлбэрт шилжиж байна. Манай улсын хувьд энэ сарын 6-аас эхэлсэн хаврын чуулган улс орныг бэлэн байдалд шилжүүлсэн онцгой нөхцөлтэй давхцаж байгаа учраас яаралтай Их Хурлын хуралдааны Дэгийн тухай хуульд өөрчлөлт оруулах шаардлагтай болсон. Миний бие энэ сарын 1-нд нэмэлт, өөрчлөлт оруулах тухай болон түүнтэй хамт дагалдан гарах хуулийн төслийг өргөн барьсныг баталлаа. Цаашид халдварын эсрэг онцгой нөхцөлийг арилгах, даван туулахтай холбоотой хуулийн төслийг нэн даруй шийдэх нөхцөл бүрдсэн. Өчигдөр эхний хуулиудыг баталсан.
Эдийн засаг, нийгмийг хөгжүүлэх үндсэн чиглэл, Төсвийн хүрээний мэдэгдэл зэрэг хаврын чуулганаар зайлшгүй хэлэлцэх олон асуудал бий. Эдгээрийг хэлэлцэх нөхцөл бүрдэж байгаа юм. 76 гишүүнтэй парламентын хэдэн гишүүн нь тусгарлагдах тийм эрсдэл байгаа учраас УИХ ямар ч нөхцөлд ажиллаж байхаар шийдвэрлэсэн. Онц байдал, дайн бүхий байдалд өндөржүүлсэн бэлэн байдлын зэрэгт шилжүүлсэн, олон улсын хөл хориотой холбогдуулан онцгой нөхцөл үүссэн тохиолдолд чуулганы хуралдааныг саадгүй явуулж байхад нэмэлт, өөрчлөлт чиглэсэн. Бүх зүйл цахимаар явагдана. Бие биенийгээ хараад чөлөөтэй ярилцах нөхцөлөөр хангагдсан байна гэж зааж өгсөн.
Нэгэнт Дэгийг тогтоож байгаа учраас хэрхэн ирцэнд орох нь чухал. Тиймээс цахим хуралдаанаас хоцорсон бол тухайн асуудлаар үг хэлэх эрхийг хасах, сануулах зэрэг арга хэмжээ авах, хариуцлагатай болгосон. Үг хэлэх хугацаа гурван минутаас илүүгүй байхаар зохицуулсан. Мөн онлайн системийн аюулгүй байдлыг хамгаалах зорилгоор тусгайлсан тогтоол гаргасан. Тагнуулын ерөнхий газар кибер аюулгүй ажиллагааг хариуцаж, үүнд нь УИХ-ын зарим байгууллага хяналт тавина. Ирэх долоо хоногоос энэ дэгээрээ явна. Саналыг цахимаар эсвэл гар хурааж авна. Харин нууц санал хураалтыг зөвхөн саналын хуудсаар авна гэж заасан" гэлээ.
Б.Лхам
