Энэ сарын 13-наас эхлэн автомашиныг дугаарын тэгш, сондгойгоор хөдөлгөөнд оролцуулах тухай мэдээлэл цацагдсан билээ. Тэгвэл энэ талаар Засгийн газрын Олон нийт, хэвлэл мэдээлэлтэй харилцах хэлтсийн дарга Ц.Ганзориг "Тэгш, сондгой дугаараар явуулах шийдвэр гараагүй. УОК-ын Шуурхай штабын зүгээс хөдөлгөөнийг хязгаарлахаар санал болгосон энэ асуудлыг Улсын Онцгой комисс хэлэлцээгүй.

Мөн Улаанбаатар хотын дарга шийдвэр гаргаагүй болно. Бөөгнөрөл үүсгэхээс сэргийлэх арга хэмжээг  Засгийн газар, Улсын Онцгой комисс, Улаанбаатар хотын удирдлагаас авч хэрэгжүүлж байна.

Цаашид урин дулаан болсонтой холбоотойгоор Туул гол дагасан, Богд ууланд бөөгнөрөх эсрэлийг тооцоолж, цэвэр агаарт зохистой амрах нөхцөлийг бүрдүүлэхээр ажиллаж байна" гэв.

Үүнээс өмнө ОБЕГ-ын дарга, хошууч генерал Т.Бадрал хорио цээрийн үед иргэдийн анхаарал суларч байгаа учир автозамын хөдөлгөөнд хязгаарлалт хийж магадгүйг хэлсэн юм.

Уг мэдэгдлийн дараа ОБЕГ-ын дэд дарга, хурандаа Б.Ууганбаяр автозамын хөдөлгөөнд дугаарын тэгш, сондгойгоор явуулах шийдвэр гаргах тухай мэдээлсэн. Тэгвэл үүнээс хэдхэн минутын дараа Засгийн газрын ХМОНХХ-ыын дарга Ц.Ганзориг ийн үгүйсгэлээ.

Г.Маргад