ХЭҮК-ийн дарга Ж.Бямбадорж болон Зөв амьдрах ухаан ТББ-ын тэргүүн Загдаа нарын утасны ярианы бичлэг олон нийтэд ил болсон билээ. Уг бичлэгт Ж.Бямбадорж нь "Гөлөгнүүдтэй гөлөг шиг харьцаж байж ялдаг" гэж хэлсэн нь нийгмийн эмзэг бүлгийг доромжилсон үйлдэл гэж олон нийт шүүмжилсэн. Тэгвэл тэрбээр уг үйлдэлдээ тайлбар хийлээ.

Тэрбээр "Би энэ мэдээллийг хийхдээ өөрийгөө зөвтгөх гэсэнгүй. ХҮЭК нь өдөр шөнөгүй шахуу ажилладаг. Загдаа над руу залгасан. Би очиж үзссэн. Түүний хийж байгаа үйлдэлд зөв зүйл бий. Архины хамааралтай, орох орон гэргүй хүмүүсийг нийгэмшүүлж байсан. Бүр Ерөнхий сайд хүртэл очсон юм билээ. Үүний дараагаас Зөв амьдрах ухаан ТББ-тайы холбоотой гомдол тасрахаа больсон учир шалгалт явуулахаар удирдамж гаргасан. Манай алба хаагчид очоод шалгалт хийх гэтэл иргэн Загдаа ямар зан авир гаргасан бичлэгийг та бүхэн үзсэн байх. Аргаа бараад цагдаа, прокурорт хандсан. Чимээгүй байж байж, арванхоёрдугаар сард болсон явдалд "Заналхийлэх гэмт хэргийн шинж чанаргүй учир хэргийг хаалаа" гэж мэдэгдсэн. 

Тэр хашаанд боолын нийгэм үйлчилж байна. Зодож байна, чөлөөтэй зорчих эрхийг хааж байна.

Бусад газарт ийм зүйл болсон бол яах бол. Иргэн Сандагдорж дахиад бидэнд гомдол гаргасан. 2018 оны жилийн эцсийн байдлаар 800 гаруй сая төгрөгийн санхүүжилт авсан. Тэгтэл мөнгө авдаггүй, өөрсдөө тэжээдэг гэж ярьсан. Голдуу төрийн байгууллагаас авсан санхүүжилт.

Тухайлбал, 2013 онд 265 сая төгрөг, 2014 онд 171 сая төгрөг, 2015 онд 81 сая төгрөг, 2016 онд 30 сая төгрөг, 2017 онд 24 сая төгрөгийн санхүүжилт авсан байна. Хөдөлмөр нийгмийн хамгааллын яамнаас 2018 онд авсан мэдээ. Үүнээс хойш хэдэн төгрөгийн санхүүжилт нэмж авсныг мэдэхгүй.

Үүнээс гадна тэнд байгаа зарим иргэдийн тэтгэвэр, тэтгэмжийг хурааж авдаг. Ажил хөдөлмөр эрхлүүлээд цалин өгдөггүй, цалингт нь хоол унд, байрлах байрандаа суутгадаг юм шиг байгаа юм.

Хамгийн гол нь энд шалгалт хийх боломж алга. Ийм л зүйл болоод байна. Манай байгууллагад ирсэн гомдлын дагуу гэнэтийн шалгалт хийх эрхтэй. Тэгэхгүй бол бэлдчихдэг. 

Олон нийтэд ил болсон ярианы бичлэгээр намайг жил шахуу дарамталж байна. 

Г.Загдаа надтай ярих үеэр нь "Чи хүнтэй зөв харьцаач ээ. Хүнтэй арслан бар шиг харьцах юм" гэж хэлсэн. Тэр хэсгийг нь хассан байна лээ. Хүн гөлөгтэй хамгийн энхрий харьцдаг биз дээ. Чи хүнтэй хүн шихг харьц гэж хэлээд ойлгохгүй болохоор нь өхөөрдөх үүднээс нь тэгж хэлсэн. Яахав, олон янзын ааш араншинтай хүмүүс байдаг. Энэ нь уурыг нь бардаг байх. Миний хоолой мөн үү гэвэл мөн. Үүнээс өмнө 40 шахам минутын бичлэг бий. Тэрийг нь тасалсан байна лээ" гэлээ.

Г.Маргад