Монголын ирээдүй, Монголын Ардчилал, тэр дундаа Ардчилсан намд маш том аюул нүүрлэсээр байгаа талаар миний бие сүүлийн 2 жил тасралтгүй хэлж, сануулж, засах гэж оролдсон. Гэтэл сайжрах нь битгий хэл улам дордож байгаа тул өнөөдөр дахин хэлье ээ.

Короно, сонгууль хоёр өдөр бүр “өрсөлдөж” буй энэ өдрүүдэд иргэд маань УИХ-ын гишүүн болох хүсэлдээ шатсан нам болоод горилогчдын “галзуурсан тоглолт”-ыг өдөр бүр үзэж байна.  Уул нь аль нам ялах вэ гэдгээс илүүтэй өнөөдөр ард түмний амь нас, эрүүл мэнд нэгдүгээр асуудал юм аа. МАН 4 жил засаглахдаа засгаа 2 сольж, улсын өрийг 4 тэрбум ам.доллараар нэмэгдүүллээ! 60 тэрбумынхан, ЖДҮ-чиддээ хариуцлага тооцож чадахгүй байгаа, 65 суудал авчихаад юу ч хийж чадахгүй байгаа МАН сонгуулийн сургаар гэнэт ингэж, тэгж мандуулна гэх юм. Одоо хэн ч итгэхгүй ээ!!!

60 тэрбумын толгойлогчид ялгүй өнгөрч, МАН-хан  60 тэрбумаараа сонгуульдах уу эсвэл Ерөнхий сайд Хүрэлсүхийн үг худал болж төсвийн мөнгөөр сонгуульдах уу?  МАН Ардчилсан намыг нэр хүнд нь унасан С.Эрдэнэ даргатай нь сонгуульд оруулахаар чармайж байна.

Муу дээрээ муу, муухай дээрээ улцан гэгчээр С.Эрдэнэ ч дуугарах бүрдээ намынхаа нэр хүндийг улам унагаж өнөөдөр Ардчилсан нам маань нам биш төрийн эрх мэдлийн төлөөх хар зах болон хувирлаа.  Ц.Элбэгдорж, С.Эрдэнэ нар Ардчилсан намд мөнгөний босго тавьж мэдлэг чадвартай, Монголоо хөгжүүлэх сэтгэлтэй шударга гишүүд, залуусын нэр дэвших боломжийг хааж байна. Тэд газрын баялаг, газар дээрэмдэн баяжсан МАНАН мафид Ардчилсан намыг хаяж өглөө. Тэдний мөнгөнд барьцаалагдсан УИХ-ын гишүүдтэй болж болохгүй ээ!!! 

Өнгөн дээрээ С.Эрдэнэ сүг болж үнэн хэрэг дээрээ Ардчилсан намыг Ц.Элбэгдорж удирдаж байна. Ц.Элбэгдорж гэдэг хүн амиа хоохойлохын тулд дахин Ардчилсан намыг маань  тоглоомын нам болгож бүүр  хонгилын гардан гүйцэтгэгч Б.Хурц нь АН-аас хэн нэр дэвшихийг заагаад сууж байна!!!

Одоо больцгоо! Ардчиллаа бод, Ардчилсан намаа бод, улс эх орныхоо эрх ашгийг бодож Ц.Элбэгдоржийн тоглоомоос гар, С.Эрдэнэ ээ.

Бас зарим нэг гүтгэлэгт хариулт өгье өө. Намайг Ардчилсан намаас хөөсөн, явсан гэх худал мэдээллийг тараасаар байгаа. Алтанхуяг өнөөдөр Ардчилсан намдаа байгаа. Гэхдээ 100 сая төгрөг тушаагаагүй ээ. Би энэ намыг 6 жил удирдаж, ардчиллыг дэмжигчидтэйгээ хамтран 5 ялалтыг байгуулж өөрчлөлт шинэчлэлт хийж, бүтээн байгуулж, Монгол хүн Монголдоо сайхан амьдрах тэр цаг хугацааг наашлуулахын төлөө зүтгэж явсандаа бахархдаг юмаа.  Ардчиллаа хулгайлуулж, Ардчилсан намаа дээрэмдүүлэхгүй гэж би тууштай тэмцсэн. Гэвч илжигний чихэнд алт хийсэн ч сэгсэрнэ, ус хийсэн ч сэгсэрнэ гэгчийн үлгэр болсон. Гэтэл хэсэг чимээгүй байсныг минь далимдуулж “С.Эрдэнэтэй 20, 30 суудал тохирч дуугүй болсон” гэж гүтгэлээ. Би ийм арилжаа наймаа хийдэг хүн биш ээ. С.Эрдэнэтэй намын дарга болсноос нь хойш 2 жил гаруй уулзаагүй ээ.

Төгсгөлд нь дахин сануулж хэлэхэд Монголын баялгаар хөлжсөн МАНАН бүлэглэл нураагүй байна. Тэд амь тэмцэн мөнгөөр зодож, энэ сонгуулиар нам намаас, бие даагчдаас, хөдөлгөөнүүдээс УИХ-д өөрсдийн тоглоомын хүмүүсээ дэвшүүлэхээр улайрч байна. Цөөн хүний мөнгөнөөс үнэтэй олон түмний эрх ашиг гэж бий!!! Шударга ёсыг тогтоож, Байгалын баялагтаа эзэн болж дундаж давхаргаа босгоцгооё!

Бодохтун, Тэмцэхтүн!