УИХ-ын Өргөдлийн байнгын хорооны өнөөдрийн хуралдаанаар Монголбанкнаас гаргасан хэрэглээний зээлийн эргэн төлөлтийн хугацааг хойшлуулах шийдвэр хэрэгжихгүй байгаа талаар ирүүлсэн өргөдлийн дагуу Монголбанкны мэдээлэл сонслоо.

Энэ үеэр УИХ-ын гишүүн Б.Баттөмөр: Хувийн хэвшилд бүх зүйлээ өгчихвөл улс орон хөгжих юм шиг бодож ирсэн нь бидний алдаа. Ялангуяа санхүүгийн зах зээл яаж хөгжих юм бэ, зах зээлээ яаж хамгаалах юм бэ гээд ямар ч загвар алга. Өнгөрсөн 30 жилийн хугацаанд арилжааны банкны загвар, хөгжил буруу жишгээр явж ирлээ. Өнөөг хүртэл таван банк дампуурч, 13 нь ажиллаж байна. Хоёр банк нь бараг нэг хүний эзэмшил. Монголын хамгийн том дөрвөн банкны гуравхан хүний өмчлөлд байна. Ийм байхад зээлийн хүү яаж буурах юм бэ. Банкны зээлийн өртөг өндөр байхаар зээлийн хүү буурахгүй. Өндөр хүүтэй хадгаламж татаж авсан. Тиймээс олон нийтэд нээлттэй компани болж байж зээлийн хүү буурах эхлэл тавигдана.

2011 оноос хойш гурав дахь удаагаа зээлийн хүү бууруулах том хөтөлбөр эхлүүлсэн. Хангалттай хэмжээнд буурсангүй. Банкны салбарт бодлого хэрэгтэй байна, төрийн зохицуулалт шаардлагатай байна.

Дэлхийн нийтэд тухайн нэг тухайн банкны 20 хувиас хэтрэхгүй хувьцааг эзэмших ёстой зохицуулалт хэрэгждэг. Энэ жишгээр арилжааны банкуудыг нээлттэй компани болгох хэрэгтэй. Монгол Улсын эдийн засгийн 93 хувь нь арилжааны банк дээр тогтож байна. Гэтэл үүний дөрвөн банкийг нь гурван хүн эзэмшдэг. Ийм доголдол байна. Хамгийн хүнд ачаа ард түмэн үүрч байна. Ерөөсөө мөнгө хүүлэлт явагдаж байна. Банкны реформыг яаралтай хийх ёстой гэж УИХ, Ажлын хэсэг болон банкны салбар үзсэн. Хэрвээ реформ хийж чадвал эрүүл тогтолцоо руу шилжих эхлэл тавигдана” гэж санал хэллээ.

Г.Нацаг