УИХ-ын Өргөдлийн байнгын хорооны өнөөдрийн хуралдаанаар Монголбанкнаас гаргасан хэрэглээний зээлийн эргэн төлөлтийн хугацааг хойшлуулах шийдвэр хэрэгжихгүй байгаа талаар ирүүлсэн өргөдлийн дагуу Монголбанкны мэдээлэл сонслоо.

Энэ үеэр УИХ-ын гишүүн Б.Ундармаа “Маш чухал сэдэв хэлэлцэж байна. Зөвхөн тойргийн иргэдээс гэлтгүй Эдийн засаг, Өргөдлийн байнгын хороонд олон санал ирж байна. Тиймээс нухацтай хандахыг Төв банкны удирдлагаас хүсэж байна. Хамгийн гол нь ипотекийн зээлийг Төв банк санхүүжүүлэхээ больсонтой холбоотой олон хүсэлт ирсэн. Яахав, Олон улсын валютын сангийн санхүүжилтийн хүрээнд ингэж шийдсэн байх. Гэхдээ ипотекийн зээлийн санхүүжилт зогссоноос хойш барилгын салбар хүндэрсэн. Тэгтэл хаана байна тэр ОУВС чинь. Өнөө 300 сая ам.доллараа өгсөн үү?.Аманд нь орчих гээд дагаж гүйгээд байсан.

Гадныхны өмнө хөлөө хугалчих гээд л гүйсэн. Ямар ч эх орон ч сэтгэлгээгүйгээр Төв банкийг удирдаж, ийм байдалд хүргэж болохгүй. Дараагийн нэг асуудал нь арилжааны банкуудыг төлөөлөөд Хаан банкнаас холбогдох албаныхан ирсэн байна.

Хууль дүрэм болохгүй байна гэлээ. Хууль дүрэм яриад суувал хэн ч ярина. Төв банк шийдвэрээ гаргаад, Ерөнхийлөгч зарлиг гаргасан бол эдэнд тушаал шийдвэрээ өгөөч ээ. Монголын банкуудын холбоо ч гэсэн арилжааны банкуудаа шахаж шаардаач ээ. Хамтарч ажилла л даа. Иргэдийн ирүүлсэн санал гомдол эцсийн эцэст Төв банкны толгой дээр л бууна шүү. Бид ер нь яах ёстой юм бэ. Монгол Улс дампуурах ёстой юм уу. ААН-ээ яах юм бэ.

Үйл ажиллагааг нь зогсоож, ард иргэдээ орлогогүй болгох юм уу. Яагаад Төв банк Засгийн газрын эсрэг үйл ажиллагаа явуулдаг юм бэ. Яагаад Засгийн газрынхаа гар, хөл болоод хамтраад явж болдоггүй юм уу. Валютыг нь ч гэсэн зардаггүй шүү дээ. ААН-ийн данснаас зээлийн төлбөрийг шууд татаж авч байна. Жаахан эх оронч сэтгэлтэй байгаач ээ. Тийм л сүрхий л юм бол ОУВС-гийн санхүүжилтээ оруулж ирээч ээ. Бусдыг дагаж гүйхдээ сайн юм билээ” гэсэн санал хэллээ.

Г.Нацаг