Шинэ парламентийн хүрд шинээр эргэхэд ердөө хоёрхон сарын хугацаа үлдэж. Сонгуульд өрсөлдөх горилогч нам, эвслүүд биенээсээ уралдаж тэнгэрийн амлалттай мөрийн хөтөлбөр санал болгосон ч Үндэсний Аудитын газраас муу дүн тавьснаар асуудалд цэг тавих шиг болов.

Нам, эвслүүд нэр дэвшигчддээ тавих шардлага, босго өндөр гэдгээ олон нийтэд зарласан ч тэд өөрсдөө энэ шаардлагад нийцэх үү гэдэг хачирхалтай. 

МАН-ын дарга Ерөнхий сайд У.Хүрэлсүх намын бага хурлын үеэр ЖДҮХС-аас эрх мэдэл, давуу байдлаа ашиглан зээл авсан асуудалд шалгагдаж байгаа нэр бүхий гишүүдийг дахин нэр дэвшүүлэхгүй гэдгээ албан ёсоор мэдэгдсэн.

Уг мэдэгдлийн араас нэр бүхий гишүүн Ерөнхий сайдын өрөөнд орж уйлан хайлсан, зарим нэг нь АТГ-ын дарга руу утас цохиж, бүр гуйж гувшсан гэх яриа хүртэл гараад байна. Одоогийн байдлаар ЖДҮ-гийн хэрэгт сайд асан Б.Батзориг тэргүүтэй гишүүдийн хэргийг шүүхэд шилжүүлсэн гэдгээ прокуророос мэдэгдсэн билээ.

Яг ийм цагийг сөрөг хүчин болох АН-аас овчиноор ажилласан ч тавьсан урхиндаа тэд өөрсдөө орох боллоо. Хамгийн наандаж л АН-ын зүгээс сонгуульд горилогчдодоо 100 сая төгрөгийн босго тавьсан нь өнгөрөгч сонгуулийн дуулиан болох 60 тэрбумын схемын түүхийг дахин давтаж, эл үйлдлийн цаана эрх мэдэл, албан тушаалын наймаа, тохироо байхыг үгүйсгэхгүй гэсэн олны хардлагыг төрүүлээд буй. Уг асуудал намжаагүй байхад АН-аас дахин нэг асуудалд хутгалдлаа. Энэ нь түүхт 30 жилийн ойгоороо Сонгуулийн тухай хуулийг зөрчиж дүүргээс тарааж байгаа нэрийдлээр иргэдэд эд бараа тараасныг зарим хэвлэлээр баримт нотолгоотой гаргаж тавьсан юм. Өөрөөр хэлбэл, Сонгуулийн тухай хуулийн 48.1, 48.1.1-д сонгууль товлон зарласан шийдвэр гарснаас хойш санал авах өдрийг дуустал аливаа этгээд өөрөө болон бусдаар дамжуулж сонгогчдын саналыг татах зорилгоор мөнгө, эд зүйл тараахыг хориглодог. Үүгээр ч зогсохгүй дэлхий нийтээр коронавирусний цар тахалтай тэмцэж, бүх нийтээрээ эрвийх дэрвийхээрээ зүтгэж байгаа энэ үед хорио цээрийн горимыг удаа дараа зөрчиж, халдвар авах өндөр эрсдэл өндөртэй бүлгийг олноор нь амралт сувилалд цугларуулж, улмаар нэг иргэн амь насаа алдахад хүргэсэн гэх.

Мөн энэ сарын 14-ны өдөр Сонгинохайрхан дүүрэг дэх АН “Grand Plaza” төвд хүлээн авалт зохион байгуулсан талаар хэвлэл мэдээллийн хэрэгслээр цацагдаад эхэллээ.

Дэлхий нийтээр коронавирусний цар тахалтай тэмцэж байгаа энэ үед манай улс ч сэргийлэх, дотооддоо нэвтрүүлэхгүй байх зорилгоор иргэдийг аль болох гэртээ ажиллах нөцөл боломжийг эрэлхийлж, ААН-үүдийг уриалж байна. Энэ жил бүх нам ижил гараанаас намын хөтөлбөр, чадварлаг нэр дэвшигчдээрээ л өрсөлдөнө. Өөр аргагүй. Гэтэл зөвхөн иргэдийн саналыг цуглуулахын тулд онцгой дэглэмийг удаа дараа зөрчиж, аминч зан гаргаж байгаа АН-хныг яах вэ, Х.Баттулга Ерөнхийлөгч өө. Уг нь та үндэсний эв нэгдлийн билэг тэмдэг болдог. Энэ ч утгаараа цар тахлын үед угшил нэгтэй намынхаа нөхдүүдэд хатуухан анхааруулга өгөхөд гэмгүй байлтай. 

Хэдий намын ажил чухал ч улс үндэстний эрх ашиг, аюулгүй байдал түүнээс чухал шүү гэдгийг санаж байж төрийг атгалцах эрхтэй болмоорсанж. Гэвч өнөөдрийг хүртэл өрнөсөн үйл явдлаас харахад АН-ынханд ийм ухамсар байна уу гэж дүгнэхээр. Тиймээс “хөнжлийнхөө хэрээр хөлөө жийе” гэж АН-ынханд хэлье. Бид гуравхан сая шүү.

Б.Лхам