УИХ-ын өнөөдрийн чуулганаар импортоор орж ирж буй хүнсний бүтээгдэхүүний татварыг нэмэгдүүлэх талаар хэлэлцэж байна. Энэ үеэр гишүүд үг хэлж, асуулт асуулаа. 

Ж.Бат-Эрдэнэ: Манай улс 1997 онд Дэлхийн худалдааны байгууллагад элссэн. Бид дотоодын үйлдвэрлэлийг нэмэгдүүллэхийн тулд импортын татвар дээрээ онцгой анхаарах шаардлага бий. Гэвч импортын татвараа эргэн харъя гэхээр Дэлхийн худалдааны байгууллага дээр зөрчил бий болдог. Тухайлбал, жимс жимсгэнээ бид дотооддоо гурван хувийг л хангадаг. Цаашид 10 хувьд хүргэх шаардлагатай. Улмаар татвар бий болгох шаардлага гардаг ч Дэлхийн худалдааны байгууллагаас дарамт ирдэг гэж яриад байна. Энэ талаар тайлбар өгөөч.

Х.Болорчулуун: Хоёр хөрш хөдөө аж ахуйн бүтээгдэхүүндээ маш өндөр татвар авдаг. Тухайлбал, ОХУ 40-50 хувь, БНХАУ 65 хүртэлх хувийн татвар авдаг. Тиймээс бид татвараа 30 хувьд хүргэхэд болохгүй зүйлгүй.

Х.Баделхан: Хуулийн төслийг дэмжиж байна. Ерөнхий сайд гурван том зорилт дэвшүүлсэн. Тодруулбал, ойрын хугацаанд шатахуун, эрчим хүч, хүнсний хэрэгцээг хангана гэсэн. Социализмын үед гэхэд Баруун аймагт гэхэд ОХУ руу төмс экспортолдог байсан. Чадаж байсан. Тиймээс дотоодын үйлдвэрлэлийг нэмэгдүүлэх зорилгоор гаргаж байгаа хуулийн төслийг дэмжиж байна. Харин 30 хувийн татварыг хэрхэн тооцсон бэ. Хоёрдугаарт, хүнс бараа татварын үнэ нэмэгдэх үү. Гуравдугаарт, хэзээнээс хуулийн төсөл хэрэгжиж эхлэх вэ?

С.Бямбацогт: Дотоодын бүтээгдэхүүн, ажлын байрыг хэрхэн нэмэгдүүлэх талаар бид ажиллаж ирсэн. Хэдийгээр ийм зорилт тавьсан ч гаднаас орж ирж байгаа бүтээгдэхүүний татвар зорилтыг хангаж чадахгүй байна. Сэлэнгэ аймагт гэхэд 6000 гаруй ногоочидтой байсан ч гаднын импортын хүнсэнд цохигдож ногоочдын тоо хоёр дахин буурсан байна. Хэрэв дотоодод ногоо тариалдаг, гаднын хүнсэнд тавих татварыг нэмэгдүүлчихвэл ногоочдын ажлын байр, орлого нэмэгдэнэ. Эх орныхоо хөрсөнд ургасан, эрүүл аулгүй хүнсээр хангахын тулд уг хуулийн төслийг боловсруулсан. Хуулийн төсөл наймдугаар сарын 1-нд хэрэгжиж эхэлнэ. Мөн Засгийн газраас 150 тэрбум төгрөгийг ногоочдод гурван хувийн хүүтэй санхүүжүүлнэ.

Б.Лхам