УИХ-ын өнөөдрийн чуулганаар импортоор орж ирж буй хүнсний бүтээгдэхүүний татварыг нэмэгдүүлэх талаар хэлэлцэж байна.

О.Баасанхүү: Хуулийн төслийг дэмжиж байна. Дотоодынхоо, генийн өөрчлөлтгүй бүтээгдэхүүн хэрэглэмээр л байна ш дээ. Яг үнэндээ монгол малын мах гэдэг. Гэтэл тарьж байгаа вакцин нь ямар билээ. Үүн шиг монгол ногоо, монголын хөрсөнд ургасан гэдэг. Гэтэл бордоо нь ямар билээ. Гадна шороог нь арилгалаа гээд монгол ногоо болж чадах уу. Тиймээс ногоочдоо дэмжээрээ, үнийг нь анхаарай. Ажил хэрэг болгоорой доо. Сонгууль угтсан ажил болгочихов. 

Тэгэхгүй бол өнөөгийн нөхцөл байдлыг харахаар нэг их хайрласан үйлдэл болчих вий. Баахан хэрэгтэй, хэрэггүй шийдвэр гаргаж цаас үрсэн тохиолдол их бий шүү.

С.Жавхлан: Монгол Улс 160 мянган тонн төмс авлаа гэсэн. Гэтэл бүгд л Жаргалантын төмс болчих юм. Яг үнэндээ 10-60 хувь нь л Жаргалант биз дээ. Гарал үүслийг нь тодорхой болго. Хотын захаар хүнсний ногоо тарьж байна. Ямар хүмүүс тариад байна. Яг үнэндээ усан дотор үрээ хийгээд ургуулчихаж байна. Хэн тэгж тариад байна. Монголын хөрсөнд ургуулсан ногоо идмээр байна ш дээ. Хатуу хяналт тавиач ээ. Дээр нь муудахаас сэргийлсэн бодис хийж байна. Хөргөгчинд байхаараа нэг их сайхан өнгө үзэмжтэй. Гаргангуут өнгөө алдчихдаг. Ийм байлгамааргүй байна. Хөдөө хөхөрдөг ногоочдоос илүү ченж гэсэн хэдэн нөхөд байна. Банкны хүүгээр гэдсээ дүүргэдэг нөхдүүд шиг хэсэг бүлэг хүмүүс байна. Ногоочид хэчнээн сайхан зүтгэсэн ч тэднээс болж хохирч байна. Монгол хүний хувиар элэг эмтэрч байна. Монголоо гээд ногоо тариалахаар дэмжих асуудал байхгүй. Аргаа бараад үүдээ барьсан биз дээ. Ийм хүмүүсээ дэмжмээр байна. Дотоодын үйлдвэрлэгчээ хэмлээд байхаар хэн юу хийх юм бэ?.

Н.Оюундарь: Сэлэнгэчүүд нийт ногооны 60 хувийг дангаараа тариалдаг. 2019 онтой харьцуулахаар авсан ургац, тариалан талбай багассан байна. Бямбацогт гишүүн тариаланчид цөөрч байна гэсэн. Энэ үнэн. Тиймээс бодит дэмжлэг хэрэгтэй байна. Гаднын ногоог бага татвартай оруулж ирэх ямар хэрэгтэй юм бэ. Дотоодоосоо хангая аа. Өмнөд хөршөөс бага татвараар авах нь дотоодын аюулгүй байдалтай шууд холбоотой зүйл.

Үүний дараа санал хураалт явуулж, гишүүдийн олонх дэмжсэн тул хуулийн төслийг анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүллээ.