УИХ-ын өнөөдрийн чуулганаар Эрүүл мэндийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж байна. Хуулийн төслийг энэ сарын 7-нд Засгийн газраас өргөн мэдүүлсэн юм.

Д.Тэрбишдагва: Хуулийн төсвийг дэмжиж байна. Гэхдээ нэг үнэн зүйл хэлье. эрүүл мэндийн салбар үнэхээр сайн ажиллаж байна. СХД-т эрүүл мэндийн төв , Баянхошуу бүс төвд барих эрүүл мэндийн төв зэрэгт онцгойлон анхаарч байгаад баярлалаа. Анхан шатны үйлчилгээ хотын захын хорооллын иргэдэд яаж хүрэх бэ. Өрхийн эмнэлгийн асуудлыг яаж тусгасан бэ?. 

Корнавирусний халдвараас болж нислэг байхгүй болсон. Гэтэл эмнэлгийн олон нэр төрлийн бүтээгдэхүүн гаднаас авдаг юм байна. Тээвэрлэлтийг ямар хэлбэрээр авчирч байхыг тусгасан уу?. 

Сахилга хариуцлагын асуудал ихээр яригдаж байна. Гэтэл 75 гишүүнээс 50 хүрэхгүй нь чуулганд ирж байна. Зарим гишүүн маск зүүхгүй байна. Үүнийг анхаараач ээ. Өөрсдөө маск зүү л дээ, үлгэр жишээ бай л даа.

УИХ-ын дарга: Ирц гайгүй ээ. Танай танхим л тийм байна. Д.Сарангэрэл сайд хариулаарай. 

Д.Сарангэрэл: 20 гаруй царцаагдсан барилга 10 гаруй төсөл байсан. Бүгдийг нь хөдөлгөсөн. Одоо 44 эмнэлэг ашиглалтад орно. Д.Тэрбишдагва гишүүн маш сайн идэвхтэй оролцсонд баярлалаа.  Нислэг зогссонтой холбоотой хүндрэл үүссэн нь үнэн. Гэхдээ холбогдох яамнаас шаардлагатай эм тариаг тусгай үүргийн онгоцоор авчирч байна. Хоёр удаа тасалдал үүссэн. Энэ үед Токиогийн онгоцоор яаралтай авчирсан. Энэ утгаара тасалдахгүй гэж ойлгож болно. Анхан шатны тусламжийн хувьд 242 өрхийн эмнэлэг бий. Тоног төхөөрөмж, боловсон хүчин, үйлчлүүлэгчдийн дэмжих үүднээс урсгал зардлыг дүүрэг нь хариуцдаг тогтолцоо руу Чингэлтэй дүүрэг шилжсэн. Ийм маягаар өрхийн эмнэлгээ дэмжих ёстой. Хуулийн өөрчлөлтөд өрхийн эмнэлэг нь нийгмийн эрүүл мэндийн чиглэлд түлхүү ажиллахаар тусгасан. Жилд бүр урьдчилсан шинжилгээ заавал хийнэ. ААН-тэй хамтарч ажиллана гэж заасан. Энэ бол томоохон дэвшил.