УИХ-ын отгон чуулган цахимаар нээлтээ хийгээд долоо ч хоноогүй байна. Төрийн ордонд тухлангаа хууль санаачилж батлахаас эхлээд тоолж барашгүй дархан эрх эдэлдэг парламентийн гишүүдийн амь нас, эрүүл мэндийг хамгаалах үүднээс чуулганыг цахимаар явуулахаас эхлээд багагүй арга хэмжээ авч буй. Тэд ч ийм байх ёстой юм шигээр хандаж, Төрийн ордны таван танхимд тархан сууж, чуулганыг эхлүүлсэн. Гэвч ард түмний сонголтоор төрд гарсан ч тэд тийм ч итгэл даахуйц биш, бүр ард түмэнд үлгэр дуурайлал болж чадахгүй хүмүүс гэдгээ өнгөрсөн хэдхэн хоногт батлан харуулчихав.

Цар тахлын үед иргэн бүрийг амны хаалт зүүх ёстой, хэрвээ УОК-ын шийдвэрийг зөрчвөл 100 мянган төгрөгөөр торгохоо албаны хүмүүс удаа дараа мэдэгдсэн. Гэтэл Төрийн ордонд чуулж буй гишүүдэд тоглоомын энэ дүрэм огтхон ч хамаагүй бололтой. УОК-ын шийдвэрийг иргэн бүр дагаж мөрдөх ёстой. Ерөнхийлөгч эсвэл Ерөнхий сайд байхаас үл хамаараад гэсэн үг шүү дээ.

Гэтэл парламентийн гишүүдийн зарим нь амны хаалт зүүхгүй хээв нэг алхаж явна. Түүгээр зогсохгүй зарим нь бүр “Вирус устгадаг амны хаалт бий” гэж тохуурхаж байна.

Хаврын чуулганаар цар тахлын үед авах эдийн засгийн хариу арга хэмжээ болон Үндсэн хуулийн хэрэгжилттэй холбогдуулан хаврын чуулганаар амжиж батлах ёстой чухал хуулийн төслийг хэлэлцэж байгаа. Гэтэл гишүүдээс ердөө 50 хүрэхгүй нь Төрийн ордонд ирсэн. Ирсэн нэгний зарим нь амны хаалтгүй энд тэнд шүлсээ үсчүүлж сууна. Эрүүл мэнд, онцгой, цагдаагийн алба хаагчдаас эхлээд шаардлагатай төрийн алба хаагчид хоногийн 24 цагаар цурам хийх завгүй ажиллаж байна. Тэд та бидний эрүүл мэнд, амь насыг хамгаалахын төлөө ийн тэмцэж байна. Энэ ч утгаараа өөрийн амь насыг иргэн өөрөө хариуцаж, ухамсартай байхыг уриалсан. 

Гэтэл зарим гишүүд чуулган ямар ч шалтгаангүй таслаж байна, зарим нь бүр амны хаалт зүүхгүй байна. Үүнийг нь УИХ-ын дага Г.Занданшатараас эхлээд УИХ-ын гишүүн Д.Тэрбишдагва, Б.Бат-Эрдэнэ удаа дараа шахаж шаардаж байна. Харамсалтай нь, хаврын чуулган эхлээд гурав хонсон ч эрхэм гишүүдийн зарим нь үүргээ ухамсарласангүй. 

Аргаа барсан Эрүүл мэндийн сайд Д.Сарангэрэл өнөөдрийн чуулганаар “Гишүүд өөрсдөө үлгэр жишээ байгаач ээ. АНУ-д амны хаалт зүүх тухай хууль батлах гэж байна. Ийм байхад та нар өөрсдөдөө үнэлэлт дүгнэлт хийх ёстой” гэж хэлэв.

Хууль хяналтын байгууллага нь амны хаалт зүүгээгүй иргэдийг торгоно, хариуцлага тооцно гэж сүрдүүлж байна. Үндэсний эрх ашиг, улсын аюулгүй байдал гэдэг утгаараа энэ нь ч зөв. Гэтэл Төрийн ордонд тухалсан эрхэм гишүүдэд Зөрчлийн тухай хууль нь үйлчилдэггүй юм гэж үү.

Эсвэл тусгай машинаар зорчиж, тусгай хөтөлбөрөөр амьдардаг гээд иргэний үүрэг хүлээх албагүй гэж байгаа юм уу. Амиа хайрлаж, цахимаар чуулж байгаа хэрнээ үүргээ ухамсарлах чадваргүй арчаагүй гишүүдийг яах бэ. Тиймээс

Ерөнхий сайд аа, УИХ-ын дарга аа, танхимын гишүүд чинь иргэний үүргээ биелүүлэхгүй байна. Анхааруулга сануулга авч хэрэгжүүлж чадахгүй бол албан ёсоор үүнийгээ мэдэгдээд хэлчих. Нэг мөр.

Нөгөөтээгүүр, Улсын Онцгой комиссын дарга, Шадар сайд Ө.Энхтүвшинд хандаж хэлэхэд Монгол Улсын иргэн бүх хуулийн дор эрх тэгш байх ёстой. Ерөнхийлөгч байна уу, Ерөнхий сайд байна уу, бүр УИХ-ын гишүүн байхаас үл хамаараад тэр шүү.

Тиймээс дүрэм журам зөрчдөг, ард түмнийг эрсдэлд оруулахад гар бие оролцож яваа маскгүй улстөрчдийг торгож, нэрсийг олон нийтэд зарлана уу гэдэг гуйлтыг дайя.

Дахин хэлье. Иргэн бүр хуулийн дор тэгш эрхтэй байх ёстой шүү.

Б.Лхам