Төрийн алба төрлийн алба боллоо, УИХ-ын гишүүнээс нахиалсан мод зэргээр хэвлэл мэдээллийн хэрэгслээр нотолгоо баримттай их яригддаг. Үнэхээр УИХ-ын гишүүн эрх мэдэл, албан тушаалаа ашиглан өөрийн хамаарал бүхий этгээдээ албан тушаалд томилуулдаг асуудал бий гэдгийг өөрсдөө баталлаа.

Тодруулбал, Үндсэн хуулийн нэмэлт, өөрчлөлтөөр УИХ-ын гишүүн Засгийн газрын гишүүнээр томилогдох, мөн томилогоонд нь оролцох, албан тушаалд хүн томилуулдаг байсныг боломжгүй болгосон. Энэ хүрээнд Улсын Их Хурлын тухай хуулийн шинэчилсэн найруулгын төсөл боловсруулсан талаар төсөл өргөн барьсан гишүүд хэлсэн юм. Энэ удаагийн хуулийн шинэчилсэн найруулгын гол заалт нь гишүүд авлига ашиг сонирхлын зөрчлөөс ангид байх тангаргаасаа няцвал хуулийн хариуцлага хүлээнэ гэж тусгасан явдал юм. Тодруулбал, олон сангаас гишүүд эрх мэдэл, албан тушаалаа ашиглан өөрт болон өөрийн хамаарал бүхий этгээддээ хямд хүүтэй зээл авч өгсөн, мөнгө хүүлсэн гэх асуудалд холбогдсон ч бүрэн эрх “халхавчаар” шалгуулахгүй үлдсэн гишүүн олон бий. Харин энэ удаагийн зохицуулалтаар гишүүд ашиг сонирхлын зөрчил гаргасан л бол хуулийн хариуцлага хүлээх асуудал нээлттэй болжээ.

Энэ талаар хууль санаачлагч С.Бямбацогт “Гишүүдийн хууль санаачлах эрхийг хязгаарлаж өгсөн. Өмнө нь гишүүд дур дурын хуулийн төсөл санаачилдаг байсан бол төсөв, санхүү, татвар, Монгол Уосын хөгжлийн бодлого, эдийн засгийн үндсэн чиглэл, мөнгөний бодлогын талаар хуулийн төсөл санаачлахгүй байх заалт тусгасан. Мөн хуралдаанд оролцсон гишүүдийн олонхийн саналаар хуулийн төсөл баталдаг байсан бол нийт гишүүдийн олонхийн саналаар болгож өөрчилсөн бөгөөд чуулганы хугацааг сунгасан” гэлээ.

Ерөнхий сайд өөрөө танхимаа бүрдүүлж, Засгийн газрын гишүүдийг томилж, чөлөөлдөг болсноор жинхэнэ мэргэжлийн Засгийн газар байгуулагдана гэж үзэж байгаа бөгөөд Засгийн газраас оруулж ирж байгаа төсвийг УИХ хэлэлцэхдээ хөл дүнд нь өөрчлөхгүйгээр хөдөлгөх боломжтой болгожээ. Учир нь нэг гишүүн тойрогтоо сургууль бариулъя хэмээн төсвийг нэмээд өг гэсний зоргоор төсөвт өөрчлөлт оруулах боломжгүйгээр шийдсэн нь энэ удаагийн хуулийн төслийн давуу тал гэдгийг онцолж байлаа. Уг хуулийн төслийг УИХ-ын гишүүн С.Бямбацогт, О.Баасанхүү, Ж.Батзандан, Д.Лүндээжанцан, З.Нарантуяа, Х.Нямбаатар, Д.Оюунхорол, Я.Санжмятав, Д.Тогтохсүрэн, Д.Хаянхярваа нарын гишүүд өргөн барьсан бөгөөд ирэх долоо хоногийн чуулганаар хэлэлцүүлэх аж. Улсын Их Хурлын тухай хуулийн шинэчилсэн найруулга долоон бүлэг 50 зүйлтэй.