УИХ-ын өнөөдрийн чуулганаар Хөгжлийн бодлого, төлөвлөлт, түүний удирдлагын тухай уулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэх асуудлаар хуралдаж байна. Хэлэлцэж байгаа асуудалтай холбогдуулан УИХ-ын гишүүд асуулт асууж, байр сууриа илэрхийлж байна.

Тухайлбал, Д.Тэрбишдагва: Ардчилалд шилжсэнээс хойш төлөвлөлт гэдэг үгнээс их айж, жийрхэх болсон. Гэтэл харин ч социализмын үеэс илүүтэй олон төлөвлөлт хийсэн байдаг. Энэ 30 жилийн хугацаанд нэр бүхий 10-аад байгууллага Монгол Улсын хөгжлийн бодлогыг төлөвлөж ирсэн байна. Үүний үндсэн дээр төлөвлөлт, бодлого гэдэг зүйлийг Үндсэн хуульдаа тусгая гэж боловсруулсан хууль. Хөгжил, төлөвлөлтийг цогцоор нь шийдэхгүй бол мянга сайхан хууль батлаад ч улс орон хөгжихгүй. Энэ асуудлыг Шадар сайд хариуцах хэрэгтэй. Тэгж байж бүх салбарыг цогцоор нь хөгжүүлэх боломжтой болно. Агентлагын дарга нар улсын хөгжил, төлөвлөлтийг хийнэ гэж байхгүй ээ.

С.Бямбацогт: Яг энэ асуудлыг тусгасан байгаа. Тогтолцоо нь босоо тогтолцоотой байна. Б.Баттөмөр: Өнгөрсөн 30 жилийн хугацаанд зах зээлийн зарчмаар явна. Эрэлт, нийлүүлэлт зохицуулна гэж төлөвлөлт, бодлогын асуудлыг орхигдуулж ирсэн. Энэ бол бидний алдаа. Энэ бол тогтолцоонд өөрчлөлт оруулж байгаа хууль. Үүнийг бид зөв авч явбал улсын хөгжлийг өөд татах хууль болно. Хэлэлцүүлгийн явцад алдаа оноог нь засна биз.

Б.Бат-Эрдэнэ: Хуулийн төслийг дэмжиж байна. Хөгжлийн бодлого төлөвлөлтийг хариуцах байгууллагын статусыг нэмэгдүүлж, яамны төвшинд байх юм уу. эсвэл Шадар сайд дагнаж явах юм. Тодорхой болгохгүй бол явахааргүй харагдаж байна. Алсын хараа-2050 зэрэг том зорилтыг хэрэгжүүлэхийн тулд ялангуяа улс төрийн намуудын хариуцлагыг нэмэгдүүлэх, бодлогыг өөрчлөхгүй бол болохгүй нь ээ. Бүхэл бүтэн 500 гаруй бодлогын баримт бичиг байна. Төрийн эрхийг авсан нам болгон бодлогын баримт бичиг гаргадаг жишиг тогтлоо.

Банкны эздүүдийг би шүүмжилсээр ирсэн. Үнэхээр улс орны төлөө явж байгаа бизнесмэнийг бол би юм хэлдэггүй. Харин өөрийнхөө, өөрт хамааралтай бизнеэсээ хамгаалбал хатуу шүүмжилдэг. Эндээс зөвхөн Монголын төлөө төлөвлөлт хийж чадах уу. Монголбанк, Санхүүгийн зохицуулах хороо, Төрийн банкны захирлууд бүгдээрээ ББСБ-тай, мөнгө хүүлж байна гэнэ. Арай биз дээ. Яаж үүнийг зохицуулах юм бэ.

С.Бямбацогт: Энэ хуулийн төслийг дагаад бусад хуульд өөрчлөлт оруулна. Засгийн газрын тухай хуульд хөгжлийн бодлого төлөвлөлтийн асуудал эрхэлсэн төрийн захиргааны төв байгууллага байна. Энэ нь үндсэн чиг үүргийн яам байна гэж тусгасан. Энэ яамыг Шадар сайд толгойлно.

Г.Нацаг