УИХ-ын өнөөдрийн хуралдаанаар Үл хөдлөх хөрөнгийн албан татварын тухай хуульд нэмэлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцэх асуудлаар хуралдаж байна.

Хуулийн төслийн талаар БОАЖ-ын сайд Н.Цэрэнбат "Дархан цаазат Богдхан уулын орчимд аялал жуучлалын нэрээр хувийн болон нийтийн, худалдаа үйлчилгээний орон сууц олноор баригдсан нь дархан цаазат уулын төлөв байдал, дэглэм горимыг ноцтой зөрчсөн үйлдэл болж байна. Тиймээс энэ зөрчлийг таслан зогсоож, байгалийн унаган төрхийг бий болгохын тулд өмчлөгч, зориулалтаас үл хамаарч иргэнээс нэг м.кв талбайгаас 1000 төгрөг, хуулийн этгээдээс 3000 төгрөгөөр бодож татвар авахаар дээрх хуульд тусгасан" гэж танилцууллаа.

Хуулийн төсөлтэй холбогдуулан УИХ-ын Төсвийн байнгын хорооноос уг хуулийн төслийг хэлэлцүүлэх нь зүйтэй гэж үзсэн талаар УИХ-ын гишүүн Г.Тэмүүлэн энэ үеэр танилцууллаа. Чуулган үргэлжилж байна.

Г.Нацаг