Коронавируст халдвар /COVID-19/-ын цар тахлаас урьдчилан сэргийлэх, тэмцэх тухай хуулийн талаар мэдээлэл хийлээ.

УИХ-ын гишүүн Ж.Энхбаяр “УИХ-ын даргын өгсөн үүргийн дагуу ажлын хэсэг Коронавируст халдвар /COVID-19/-ын цар тахлаас урьдчилан сэргийлэх, тэмцэх тухай дөрвөн бүлэг, 19 зүйлтэй хуулийн төсөл санаачлан өргөн барилаа. Энэ хууль нь нэг удаагийн бөгөөд халдвар намжтал үйлчилнэ. Бүх нийтийн бэлэн байдалд шилжүүлсэн хугацаанд цар тахлаас урьдчилан сэргийлэх, нийгмийн эрүүл мэндийг хамгаалах, иргэн, ААН-ийн эрхэд тодорхой хязгаарлалт хийх, холбогдох шийдвэрийг шуурхай байгуулах, зохион байгуулах асуудлыг Засгийн газарт онцгой журмаар эрх олгож шийдвэрлэх зорилготой үүссэн харилцааг зохицуулна.

Мөн Засгийн газрын эрх үүрэг, төсөв мөнгө, эрх мэдэл, хүн ард, ААН, хүлээх үүрэг, хариуцлага гээд өргөн үүрэг хамарсан хуулийн төсөл бэлэн болгоод байна. Уг хуулийг яаралтайгаар Монгол Улсын нутаг дэвсгэрт яаралтай сурталчлах нөхцөл байдал үүссэн. Учир нь иргэн, ААН-ийн эрхийн тодорхой хязгаарлалт хийх, Засгийн газрын хэрэгжүүлэх, авах арга хэмжээг улс даяар мөрдөх, хязгаарлалтын дэглэмийг зөрчсөн иргэн, ААН-д захиргааны болон эрүүгийн хариуцлага хүлээлгэхээр эрх зүйн шинэ орчныг бүрдүүлсэн хуулийн төсөл болсон” гэлээ.

Хууль батлагдсан өдрөөс эхлээд ДЭМБ-аас цар тахлын аюул арилсан гэх хүртэл хууль үйлчлэх юм. Засгийн газар хойшлуулашгүй хэрэгжүүлэх бүх арга хэмжээг хэрэгжүүлэхэд уг хуульд зохицуулжээ. Мөн батлагдсан төсвийн хүрээнд төсвийн ерөнхийлөн захирагч нарын зардлыг өөр хооронд нь шилжүүлэх замаар зардлыг нэмэгдүүлэхгүйгээр тодорхой төсвйн зохицуулалт хийх эрх олгож байгаа. Сонгуулийн хуулиас бусад нийтээр цуглахаар үүрэгжүүлсэн харилцаануудыг энэ хуулиар зохицуулсан.

Б.Лхам