Сонгуулийн чимээ ойртсон биш горилогчид “Зүүдээ ярих гээд хулгайгаа ярив” гээч болж байх шиг байна. Тухайлбал, УИХ-ын гишүүн Б.Дэлгэрсайхан Дорноговь, Говьсүмбэр аймгаас сонгогдсон. Ирэх сонгуульд ч тойргоосоо өрсөлдөхөөр зэхэж буй. Тэгвэл түүний хүчтэй өрсөлдөгчөөр АН-аас нэр дэвшихээр горилж буй “Сүндий” сангийн үүсгэн байгуулагч, “Нэткапитал” санхүүгийн группын ТУЗ-ийн дарга Д.Сүндий тодроод буй.

Түүний хувьд нас залуу, цус шингэн шигээ улс төрийн дорвитой туршлагагүй нэгэн. Дээр нь "Хэро холдинг"-ийн захирал Х.Ганхуягийн сонгуульд горилогч нарын талаарх дэлгэсэн баримтаар Д.Сүндий өөрийн төрсөн ах Д.Ариунболдын хамт өрсөлдөхөөр зэхэж буй гэх. Яг таг баталсан зүйл байхгүй ч оргүй зүйл биш гэдгийг учир мэдэх хүмүүс эхнээсээ дуугарсан.

Тэгвэл нэг тойрогт өрсөлдөхөөр санаархаж буй хоёр эрхэм эхнээсээ араа шүдээ хавираад эхэлсэн байна.

Тухайлбал, УИХ-ын Өргөдлийн байнгын хорооны хуралдаанаар Б.Дэлгэрсайхан гишүүн “ББСБ-ын эзэд нь хэн бэ, санхүүжилтийн эх үүсвэрээ хаанаас олж байна, авлигын мөнгийг угаагаад байгаа юм биш үү” гэж Монголбанк, Санхүүгийн зохицуулах хорооноос асуусан нь горилогч Д.Сүндийгийн эгдүүцлийг төрүүлснээр тэдний дунд өрнөсөн галыг өрдөх шиг боллоо.

Б.Дэлгэрсайхан гишүүний хувьд “Банк бус санхүүгийн байгууллагын эзэд нь ямар хүмүүс байдаг юм бэ. Саяхан АТГ-ын хэлтсийн дарга хүн твиттерт жиргэсэн байна лээ. ББСБ-ын эзэд нь Монголбанк, Санхүүгийн зохицуулах хороонд ажиллдааг гээд албан тушаалтай нь бичсэн байсан. Ингэж болдог юм уу. Төрийн албанд өндөр албан тушаал хашдаг хүмүүс ББСБ-ын бизнес эрхэлж болдог юм уу. Хоёрдугаарт, санхүүгийн эх үүсвэрийг шалгадаг уу. Эх үүсвэр нь хаанаас гардаг юм бэ. Саяхан Ч.Сайханбилэгийн хөрөнгийг угааж байна гэж нэг банк бус санхүүгийн байгууллагыг цоллосон. Удахгүй нотлох баримт тавина гэсэн. Би ч гэсэн үнэний ортой гэж бодож байна. Учир нь гуравхан жилийн өмнө энэ ББСБ миний эзэмшлийн компаниас мөнгө зээлье гэж ирж байсан. Гэтэл одоо энэ компанийн захирал залуу “Манай компанийн дүрмийн сан 60 тэрбум болсон” гэлээ. Надад өөрөө ярьсан. Баримт нь бий. Яагаад ББСБ-ын дүрмийн сан ингэж огцом өсөж байна вэ?. Мөнгө угаах гээч нь яваад байгаа юм биш үү. Ялангуяа авлигын мөнгийг угааж байна уу. Түүнээс биш гаднаас мөнгө оруулж ирээд мөнгө угаана гэж юу байхав. Үүнийг шалгадаг уу” гэсэн юм. Түүний хувьд ингэж асуух нь зүйн хэрэг. Гэвч “хулгайч хулгайчийг бариарай” гэж хашхирдаг гэдэг зүйл болсон юм.

Учир нь тэрбээр “Болд Ерөө гол” компани болон өөрийн эзэмшлийн төмөр замын дуулианаас эхлээд бүр оффшор бүсэд данстай болох нь илчлэгдэж байсан тийм ч нэр цэвэр хүн биш.

Эрхэм гишүүнийг ийн хэлсний дараа түүнээс зээл гуйсан захирал хэн бэ гэдгийг хэн ч гадарлаагүй байсан. Гэтэл санхүүжилт гуйсан захирал нь “Нэткапитал” санхүүгийн группын ТУЗ-ын дарга Д.Сүндий бололтой. Үүнийгээ ч тэрбээр батлах мэт мэдэгдэл хийчихэв.

Тэрбээр “Миний зургийг Ерөнхий сайд асан Ч.Сайханбилэг тэргүүтэй хүмүүстэй зэрэгцүүлсэн постерыг Дорноговь аймаг болон цахим орчинд тараасан үйлдлийн эзнийг олж чадахгүй байсан юм. Гэтэл ашгүй өөрөө гарч ирэх шиг боллоо. УИХ-ын гишүүн хүн хэлсэн үгэндээ эзэн байж хариуцлагатай бай. Би Ч.Сайханбилэг гэж хүнтэй 2008 оноос хойш нэг ч удаа уулзаагүй. Дараа нь нэг хоолны газар тааралдсан. Таниагүй. Өнөөдөр залуучуудын үе ирж байна. Гэтэл элдэв янзын постер хийж тараах юм. Төрийн түшээ болж, төр барилц гэж явуулснаас биш ингэж эвдэр гээгүй байх шүү.

Бид маш олон ажил дээр хамтарсан. Та мэднэ. 2015 онд хүртэл Морин спорт уяачдын холбооны шугмаар 14 сумдаар тойрч явж байсан.

Ийм увайгүй зүйл ярьж болохгүй байх аа. Манайх Худалдаа хөгжлийн банк, Голомт, Хас лизинг болон бүх даатгалын компаниуд, хувь хүмүүстэй хамтарч ажиллах замаар бонд зарж хөрөнгө босгодог. Үндсэндээ 12 дэх жилдээ үйл ажиллагаа явуулдаг. Тайлан, бланс хуулийн дагуу бий. Нэг ч бэлэн мөнгөний гүйлгээ хийдэггүй. Мөнгө угаах ямар ч боломжгүй. Нас, намбандаа баймаар байна. Дүрмийн сан, актив хоёроо ялга. Уул уурхайн бизнесээ санхүүгийн бизнестэй битгий харьцуул. Санхүүгийн салбар бол уул уурхай шиг уулнаас, газраас баялаг ухаж аваад тогтсон ханшаар зардаг салбар биш” гэсэн юм.

Нэг тойрогт өрсөлдөхөөр зэхэж буй горилогчид ийн мэдэгдэв. Эндээс үзвэл, тэд цөөнгүй удаа хамтарч ажиллаж байсан бололтой. Бүр нэгнээсээ мөнгө гуйх хэмжээний дотно байж.

Гэвч “Улс төрд мөнхийн найз гэж байдаггүй” гэдэгчлэн нэг л өдөр нэгнээсээ нүүр буруулсан бололтой юм.

Сонгууль дөхөхийн хэрээр энэ мэт зүүдээ ярих гээд хулгайгаа, булхай, булайгаа илчлэх горилогчид улам олширно. Тиймээс иргэн бүр дор бүрнээ ухамсартай байж эрүүл ухаанаар хэн нь хэн бэ гэдэгт үнэлэлт дүгнэлт өгөх нь зүйтэй биз ээ.

 Г.Нацаг-Эрдэнэ