Улсын Ерөнхий прокурорын тушаалаар олны анхааралд орсон хэргүүдийг хянах үүрэгтэй ажлын хэсэг байгуулагдан, олны анхаарал татсан томоохон хэргүүдийг шалгаж, шүүхэд шилжүүлсэн билээ. 

Тодруулбал, Авлигатай тэмцэх газраас Ерөнхий сайд асан С.Баяр, Ч.Сайханбилэг, Сангийн сайд асан С.Баярцогт нарыг Оюутолгойн гэрээг үзэглэхдээ албан тушаалын байдлаа ашиглаж, бусдад давуу эрх олгосон байж болзошгүй гэх үндэслэлээр яллагдагчаар татан шалгаж, шүүхэд шилжүүлэх саналтай прокурорт хүргүүлсэн. Тэгвэл прокуророос тэдний хэргийг мөн шүүхэд шилжүүлсэн талаар мэдээлж байв.

Мөн  сүүлийн хэдэн жил дамнан “Эрдэнэт” үйлдвэрийг гадны банкинд барьцаалан зээл авсан асуудлаар Жастын Ш.Батхүү, Ч.Ганзориг нарыг хэргийг ч шүүхэд шилжүүлсэн гэдгийг мөн мэдэгдсэн. 

Тэгвэл Эрдэнэт үйлдвэрийг Өмнөд Африкийн Стандарт банкны барьцаанд тавьсан, Эрдэнэт үйлдвэрийн Эрсдэлийн сангаас 40 сая ам.долларыг тус банкинд төлсөн зэрэг асуудлаар TB9 телевиз өчигдөр мэдээлсэн байна. Энэ талаар Ерөнхий сайд асан С.Баяр "Н.Энхбаярын хамаарал бүхий хэвлэл олон жил гүтгэлэлээ. Даварсаар даварсаар, Хэвлэл мэдээллийн хэрэгсэлтэй зарга хийхгүй гэсэн бодол маань хуучин даргын халаасны эдгээр байгууллагыг бүр оодруулж. Миний буруу, буруугаа засна. Тэд нотловол би ялаа авна. Үгүй бол тэд хариуцлагаа хүлээнэ" гэж твиттерт жиргэжээ. 

Эндээс үзвэл, Ерөнхий сайд асан С.Баяр Эрдэнэт үйлдвэрийн барьцаалагдсан хэрэгт өөрийгөө гэм буруугүй гэж хэлж буй бололтой. Өөрөөр хэлбэл, экс Ерөнхийлөгч, экс Ерөнхий сайд нарын дундах дайн дуусаагүй. Харин ч сонгууль дөхөх тусам улам даамжрах юм шиг байна. Хамгийн гол нь нэгэнтээ АТГ болон прокуророос мэдэгдсэн мэдээллийн юунд нь тэрбээр ийн эмзэглэсэн нь тодорхойгүй үлдэв. 

Г.Маргад