Олон улсын жүдо бөхийн холбооноос 2016 оны олимпийн эрх олгох анхны тэмцээн болох “Чингис хаан-2012” жүдо бөхийн дэлхийн цомын аварга шалгаруулах тэмцээн маргааш эхлэх гэж байна.
    Дөрөв дэх жилдээ зохион байгуулж буй уг тэмцээн энэ сарын 8, 9-нд Спортын төв ордонд болох юм. Уг тэмцээнд 20 гаруй орны тамирчин оролцохоор мэдүүлгээ ирүүлсэн байна. Харамсалтай нь манай оронд ирэхэд зардал өндөр гарч байгаагаас шалтгаалж 13 орны тамирчин ирэхээр болсон байна. Олон улсын жүдогийн холбооноос томилогдсон 10 орны 19 шүүгч тэмцээнийг шүүнэ. “Чингис хаан-2012” тэмцээний шагналын нийт сан 50 мянган ам.доллар. Жин тус бүрт түрүүлсэн тамирчинд “Чингис хаан” алтадсан цом, 1000 ам.доллар дагалдах бол мөнгө, хүрэл медальд 500, 250 ам.доллар дагалдана. Мөн эрэгтэй, эмэгтэй шилдэг тамирчныг “Ippon trophy” цомоор шагнах гэнэ. Олон улсын жүдо бөхийн холбооны дүрмийн дагуу тэмцээн зохион байгуулагч орон жин тус бүрт дөрвөн тамирчин оролцуулах эрхтэй. Тиймээс манай улсын 56 тамирчин хүч үзнэ.
Тэмцээний онцлог нь манай 56 тамирчин дотор олимпийн медальтнууд байхгүй. Учир нь залуу тамирчдаа дэмжин, хойч үе, залгамж халаагаа гаргах зорилготой аж.