Хичээлийн шинэ жил эхэлснээс хойш бага насны хоёр хүүхэд зам тээврийн ослоор амиа алдаад байгаа юм. Өнгөрсөн хоногт гэхэд нэг хүүхэд машинд дайруулсан байна. Тодруулбал, Баянзүрх дүүрэг буюу Зүүн дөрвөн замын уулзварт 07:00 цагийн үед автомашины осол гарч, 16 настай хүүхэд хүнд гэмтжээ. Түүнийг гарцаар гарахаар явж байхад жолооч замын хөдөлгөөний дүрэм зөрчин дайрсан байна. Одоогийн байдлаар хүүхдийн биеийн байдал хүнд байгаа аж. Харин осол гаргасан жолооч нь Хятад улсын иргэн байсан бөгөөд Замын цагдаагийнхан тэр дор нь саатуулжээ. Жолооч ямар нэгэн биеийн байцаалтгүйгээс гадна тээврийн хэрэгслийн гэрчилгээгүй байсан аж. Цагдаагийхан машиныг нь шүүж үзээд өөр дугаартай болохыг тогтоожээ.