Цар тахлын голомтод зориулж Ерөнхийлөгч Х.Баттулга өөрийн хувийн зүгээс 5000 ширхэг хамгаалалтын хувцас хандивлаж буйгаа өнөөдөр УОК-ын дарга, Шадар сайд Ө.Энхтүвшинд гардууллаа.

Энэ үеэр “ДЭМБ-аас цар тахлын хамгийн хүнд үе тулгарч байгааг онцолсон. Ерөнхийлөгчийн хандивласан хамгаалалтын хувцсыг дотоодын үйлдвэрлэгч  "Эксклюзив" компани оёсон. Өдөрт 1200 ширхэг ийм бүтээгдэхүүн үйлдвэрлэх хүчин чадалтай. Цаашдаа олон улсын зах зээл дээр гаргах зорилготой.

Тус компаниас Польш улс худалдан авалт хийх санал тавьсан байна.

Захиалгатайгаа уялдуулан өдөрт 160 мянган ширхэг үйлдвэрлэх боломжтой гэсэн. Монголчууд бид дотоодын нөөц боломжоо ашиглан хамгаалалтын хувцас үйлдвэрлэх боломжтойг тус компани харууллаа. Эмч, ажилчид хүнд үеийг даван туулж чадна гэдэгт Х.Баттулга Ерөнхийлөгч итгэлтэй байгаагаа уламжилсан. Хамгаалалтын хувцас нь нэг ширхэг нь 38 мянган төгрөгийн үнэтэй. Материалын хувьд хятад улсаас авч байгаа. Ерөнхийлөгч БНХАУ-д айлчлах үеэрээ материал ханган нийлүүлэх санал тавьсан. Хятадын зүгээс дэмжлэг үзүүлэхээ илэрхийлсэн. Тиймдээ ч эцсийн бүтээгдэхүүн бэлэн болж та бүрэнд хүлээлгэж өглөө. Та бүхний ажилд амжилт хүсье" гэлээ.

Харин Шадар сайд Ө.Энхтүвшин "Маш их баярлалаа. Хамгаалалтын хувцас дутагдалтай байсан.

Өмнө нь бидэнд ийм хувцас үйлдвэрлэх боломжтой гэдгээ танилцуулж байсан. Монгол Улсын Ерөнхийлөгч Х.Баттулгад баярлалаа. Манай эмч, эмнэлгийн ажилтан, онцгой, хилийн алба хаагчид хариуцлагатай ажиллаж байна. Тэдэндээ тэгшхэн хуваарилна. Өнөөдрийг хүртэл хичээж ажиллаж байна. Бид онгоц руу гол анхаарлаа хандуулж байсан. Гэтэл Алтанбулагаар орж ирсэн жолооч гэргийнхээ хамт вирусний халдвартай болох нь батлагдлаа. Энэ утгаараа хилийни боомтоор орж ирж байгаа тээврийн жолооч нар, ачаа тээврийг сайтар нягтлах ёстойг бидэнд санууллаа" гэсэн юм.