Олон улсын парламентийн Холбооны удирдах зөвлөлөөс ирүүлсэн шийдвэрийг судалж холбогдох санал, дүгнэлт боловсруулах үүрэг бүхий түр хороо хуралдаж байна. Хуралдаан хаалттай болж байгаа бөгөөд хуралдаанд Улсын Ерөнхий прокурорын орлогч М.Чинбат, УЕП-ын ял эдлүүлэх ажиллагаанд хяналт тавих хэлтсийн дарга Д.Энхтөр, Нийслэлийн Прокурорын орлогч Ц.Насанбат, өмгөөлөгч С.Оюунцэцэг, Ц.Гүенбат оролцож байна. Хаалттай хурал эхлэхээс өмнө УИХ-ын гишүүн Ж.Батзандан сэтгүүлчдэд дараах тайлбарыг өглөө.

-ОУПХ-ны шийдвэрийг хэлэлцэх гэж байна. Энэ хэрэгт зөв хүмүүсээ ялласан гэж бодож байна уу?

-Хэргийг илрүүлсэн болж хэргийг гэмгүй хүмүүст үүрүүлсэн гэдэг байр суурийг Т.Чимгээ, Б.Содномдаржаа нарын гэр бүл илэрхийлсэн. Эрүүдэн шүүх замаар гэмгүй хүмүүст ял үүрүүлсэн.  

-Прокуророос тоймтой мэдээлэл өгөхгүй байна. Шүүх хурлын процесс удаашралтай байгаад та ямар бодолтой байна вэ?

-Төв аймгийн сум дундын шүүх хурал хойшлоод найман сар боллоо. Прокурор шүүх хурлыг хойшлуулах нь буруу гэж эсэргүүцэл бичсэн. Мөн зургаан сар боллоо. Сонгууль өнгөрөөхийг хүсэж байна. Би УИХ-ын гишүүн, төрийн түшээ хүний хувьд энэ хэрэг 1000 жил болсон ч илжрэхгүй. Гэмгүй хүмүүсийг суллахын төлөө чадах бүхнээ хийнэ. Улс төрийн тэмцлээ зогсоохгүй.