Ерөнхий сайд У.Хүрэлсүх болон Эрүүл мэндийн сайд Д.Сарангэрэл нар тусгай шаардлагатай эм тариа дотооддоо үйлдвэрлэж буй "Мөнхийн тун" компанийн үйл ажиллагаатай танилцлаа.

Тэрбээр "Би УОК-ын даргаар хэд хэдэн удаа ажилласан. Өвчнөөс хамгаалах хамгийн сайн арга нь урьдчилан сэргийлэх. Иргэд өөрсдийн дархлаагаа дэмжих ёстой. Тэр дундаа ковидоос хамгаалахын тулд спортоор хичээллэ, аграа салхинд гар, шим тэжээлтэй хоол ид, 00.00 цагаас өмнө орондоо ор. Архи их уувал дархлаа суларна. Тиймээс согтууруулах ундааны хэрэглээгээ багасга. Бид халдварыг илрүүлж, хамгаалж, тусгаарласан. Хэрвээ алдвал аюул тулгарна шүү. Энэ аюулаас нэг жилээс 1.6 жилийн дараа гарна. Тиймээс бэлэн байдалд байх ёстой. Монгол хүн тусахгүй юм байна. Бид тусахгүй юм байна гэж тайвширч болохгүй шүү. Үр хүүхдүүдээ аваад хөдөө гар. Аль болох төв суурин газраас хол байхыг хичээ. Дэлхий  нийтийн 80 хувь нь хорио цээрийн нөхцөлд байна. Дэлхийн эдийн засаг самуурч байна. Шүд зуугаад тэмцэхээс өөр аргагүй. Аль болох эрдэнэт хүний амь нас эрсдэлд оруулахгүйгээр даван туулах ёстой. Шаардлагатай гэвэл одоо байгаагаас илүү хатуу хяналт тавьж магадгүй. Цагийн байдал өдөр ирэх тусам өөрчлөгдөж байгаа учир үүнтэй холбогдуулж шийдвэр гаргана.

Улсын хэмжээнд онц байдал тогтоохыг үгүйсгэхгүй. Үүнд ард иргэд бэлэн байх ёстой. Гэхдээ бэлэн бай гэж хэллээ гээд хоол хүнсээ бэлд гэсэн үг биш шүү.

Хоол хүнсний хэрэглээгээ долоо хоногоор бэлдэх хэрэгтэй. ОХУ-д долоо хоногт нэг удаа эмийн сан, дэлгүүр орохыг зөвшөөрч байна. Үүн шиг арга хэмжээ авахыг үгүйсгэхгүй. 

Сонгууль дөхсөнтэй холбогдуулан вирусаар далимдуулж ташаа мэдээлэл цацаж байна. Тиймээс хууль хүчний байгууллагад ийм хүмүүстэй хатуу хариуцлага тооц гэж хэлсэн. Миний өмнөөс ярилцлага хийгээд тараасан тохиолдол хүртэл гарсан. Үүнд нь ард түмэн итгэж байх шиг. Ард иргэд хаанаас үнэн бодит мэдээлэл авахаа сайтар тунгаах хэрэгтэй байна. Мэдээллийн урсгалыг хянаж, хязгаарлаж болно. Гэхдээ шаардлагатай гэж үзвэл ийм арга хэмжээ авна" гэлээ.

Г.Маргад