УИХ-ын чуулганы өнөөдрийн хуралдаанаар УИХ-ын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслийг хэлэлцэх эсэх асуудлыг хэлэлцэж байна. Энэ үеэр УИХ-ын дарга Г.Занданшатар УИХ-ын гишүүн О.Баасанхүүд "сануулга" өглөө.

Тэрбээр "Үндсэн хуулийн 16.14-д зааснаар хүн бүр тэгш эрхтэй. Албан тушаалтны хүүхэд дипломат алба хашиж болохгүй гэх нь өрөөсгөл. Ер нь гэм буруутай хүний ял зэмийг гэр бүлийн гишүүдэд нь халдаан хэрэглэхийг хориглоно гэсэн Үндсэн хуулийн заалт бий шүү. Тиймээс бусдын эрх, эрх чөлөөг хязгаарлах боломжгүй сануулъя, О.Баасанхүү гишүүнээ" гэсэн юм.

Г.Занданшатар дарга ийн бухимдаж, сануулга өгөхдөө тулсны учир нь Цар тахлын үед хэрэглэх нэг удаагийн хуулийн төслийг хэлэлцэх үеэр О.Баасанхүү гишүүн "УОК-ын шийдвэр эцсийнх баймаар байна. Учир нь эрх мэдэлтэй албан тушаалтай хүмүүс эрх мэдлээрээ далайлгаад байвал хэн хууль биелүүлэх юм бэ. Өөрийн үр хүүхдээ авчирч байна.

Бүр нууц амрагаа авчирч байна. Өөрсдөө зугаалж явчихаад албатай юм шиг ядарсан иргэдийн суудал бөглөж ирдэг. Ингэж увайгүй загнаж Монголд ирчихээд шударга царай гаргадаг.

Онгоцны нэг ч гэсэн суудлыг хий хүмүүст өгмөөргүй байна. Хуульд үүнийг яаж оруулах бэ. Эрх мэдлээрээ далайлгадаг сайд, дарга нарт хуулиар хариуцлага тооцох боломжгүй юм уу" гэсэн юм. 

Тэгвэл О.Баасанхүү гишүүний зугаалж яваад ирсэн. Ирээд шударга царайлдаг гэж ШИНЭ намын гишүүн, УИХ-ын гишүүн Л.Болд, МАХН-ын дарга Н.Энхбаяр, УИХ-ын гишүүн А.Ундраа нарыг хэлж буй бололтой. Л.Болд гишүүний хувьд албан ажлаар Их Британи яваад буцахдаа Берлинээр дайрч тусгай үүргийн онгоцоор Монголд ирсний дараа 14 хоног тусгаарлах байранд, гэртээ 14 хоног тусгаарлах горим барьсан юм. 

Г.Нацаг