Хэлсэн үг, хийсэн үйлдэл нь зөрдөг гишүүд энэ цагийн парламентад цөөнгүй. Тэдний нэг нь АН-аас хөөгдөж, ШИНЭ намыг байгуулалцсан Л.Болд гишүүн. Өнгөрч долоо хоногт УИХ-ын чуулган, байнгын хорооны хуралдаанаар хэд хэдэн чухал хуулийн төслийг хэлэлцсэн. Эдгээрийн дундаас УИХ-ын Аюулгүй байдлын байнгын хорооны энэ сарын 22-ны өдрийн хуралдаанаар Коронавируст халдварын цар тахлаас урьдчилан сэргийлэх, тэмцэх тухай хуулийн төсөл болон холбогдох бусад хуулийн төслийг хэлэлцэж, чуулганы нэгдсэн хуралдаанд танилцуулахаар тогтсон юм. Хэлэлцэж байгаа асуудлаар байнгын хорооны гишүүдийн дунд багагүй маргаан дэгдэж, хоорондоо ам зөрсөн.  

Л.Болд: Цар тахлын үед авч хэрэгжүүлэх арга хэмжээний талаарх хууль батлах ёстой юу гэвэл, тийм. Гэхдээ өргөн барьсан хэлбэрээр нь баталвал ямар ч хэрэг байхгүй. Харин ч сөрөг үр дагавартай. Хийж байгаа ажлыг саатуулсан, сааруулсан. Цаашид юу хийхээ тусгаагүй байна. Дэлхийн улс орнууд ангал руу унаж байхад Монгол Улс харин ч маш сайн барьж байна. УИХ ирэх таван сар гарангуут сонгууль гээд алга болно. Тиймээс болзошгүй аюулыг хохирол багатай даван туулахад зориулсан хууль батлах ёстой. Тийм биз дээ. Өнөөдөр Монголын дотоодод халдвар гараагүй байна. Гэхдээ ийм байдал хэр үргэлжлэхийг хэн ч таашгүй. Москвад хэдхэн хоногийн өмнө тайван байсан. Гэтэл өнөөдөр ямархуу байдалтай байна. Хэрвээ ийм нөхцөл байдал үүсвэл хуулийн бүх гаргалгаа хийгдсэн байх ёстой. Хуулийн төсөлд тусгасан заалтыг уншвал та нарын инээд хүрнэ дээ.

Ж.Энхбаяр: Унш, унш.

Л.Болд: Минут дуусах гээд байна. За яах вэ. уншиж өгье. Өндөр насны тэтгэвэрт гарсан эмч, эрүүл мэндийн ажилтныг эрүүл мэндийн үйлчилгээ үзүүлэх ажилд татан оролцуулж, урамшуулах. Энэний төлөө хууль гаргаж яах гэж байгаа юм бэ. Ойлгохгүй байна. Халдвар авсан байж болзошгүй иргэнийг олж илрүүлж, шинжилгээнд хамруулах, тусгаарлах ажлыг зохион байгуулна гэж байна. Энэ процесс огт хийгдэхгүй байгаа юм уу. Хаашаа юм бэ. Ийм юмны төлөө хууль гаргаж яах гээд байгаа юм бэ. 

Ажлын байр хадгалах талаар ААН-д дэмжлэг үзүүлнэ. Ямар дэмжлэг үзүүлэх гэж байгаа юм бэ.

Тэрийгээ тодруул л даа. ЖДҮХС-гийн хөрөнгийг нэмэгдүүлж, санхүүжүүлэх. УИХ-д ийм эрх нь байгаа биз дээ. Хаанаас хэдэн төгрөгийг аваад хаашаа өгөх эрх нь нээлттэй. Ийм уриа лоозонгийн хуулиар яах гээд байгаа юм бэ. 

Гадаадад зорчих эрхийг тодорхой хугацаагаар хязгаарлах. Үгүй, ямар учиртай юм бэ. Хязгаарлачихсан биз дээ. Одоо үүнээс илүү яах гээд байгаа юм бэ. 

Өмчийн хэлбэрээс үл хамаарч сургууль, цэцэрлэгийн үйл ажиллагааг зогсоох. Зогсоочихсон биз дээ. Ийм жагсаалт баталж яах юм бэ. Бодитоор юу хийх хэрэгтэй гэдгээ бич л дээ. 

Т.Аюурсайхан: Манай улсын иргэд нэг хүний эрх чөлөөнөөс нийтийн эрх ашиг хөндөгдөнө гэдгийг ухамсарлаж, эв нэгдэлтэй байгаадаа вирусний халдварыг барьж байна. Гэтэл зарим улсад маск зүүх эсэх нь миний эрх чөлөө гэж байна. Тусгаарлана гэхэд "Ямар хуулийн заалтаар намайг тусгаарлах гэж байгаа юм бэ. Миний эрх чөлөөнд халдлаа" гэдэг тохиолдол гарсан. "Шинжилгээ өг" гэхээр "Өгөхгүй" гэж байна. Гадаад, дотоодын зарим иргэд "Шинжилгээний хариугаа хэлэхгүй, нууц" гэнэ. Хэнтэй уулзснаа хэлэхгүй гэж байна. Энэ бүхнийг зохицуулах хэрэгтэй байна. 

Ж.Энхбаяр: Л.Болд гишүүнээ, та хуульд байхгүй заалт уншаад байна. Бичиг баримттай андуурсан байх. Юмаа шалга. Хоёрдугаарт, та өнгөрсөн хугацаанд Монголд байгаагүй. Гадаадад явж явж ирээд тусгаарлагдсан. Монголын төр таныг авчирсан шүү. 

Л.Болд: Би ажил ярьж байна шүү. 

Ж.Энхбаяр: Авчирсан нь үнэн биз дээ. Та анх удаа байнгын хорооны хуралдаанд сууж байна. Өнгөрсөн хугацаанд Засгийн газраас эрс шийдэмгий алхам авч хэрэгжүүлсний хүчинд халдвар тархахаас сэргийлж чадсан. Цар тахлын голомтод ажиллаж байгаа төрийн алба хаагчдын ажиллах нөхцөлийг бүрдүүлсэн хууль эрхзүйн орчинг бий болгох шаардлага үүссэн. Аливаа бэрхшээл, гамшигт бэлэн байж даван туулна. Хуулийн төсөлд илүү, дутуу юм ерөөсөө байхгүй.  

Л.Болд: Би ажил ярьж байхад хувь хүн рүү дайрч доромжлоод байх юм. Би эх орондоо ирсний дараа 35 хоног тусгаарлалтад байсан. Энэ хугацаанд судаллаа. Бараг л сургалтад суусан юм шиг болсон. Т.Аюурайхан гишүүний хэлсэн саналыг тусгаж болж байна. Ийм хууль баталснаар өнөөдрийг хүртэл ажиллаж ирсэн төрийн алба хаагчдын ажил хууль бус болно.

Ийм нэгэн маргаан байнгын хорооны хуралдаанаар болсон.

Л.Болд гишүүн цар тахлын үед авч хэрэгжүүлэх арга хэмжээг зохицуулах хуулийн төслийг ийн шүүмжилсэн. Шүүмжлэл нэг талдаа зөв байхыг үгүйсгэхгүй. Гэхдээ асуудалд няхуур хандаж л байгаа юм бол өөрөө аливаад хариуцлагатай байх ёстой. Гэсэн атлаа амны хаалт зүүх тал дээр хойрго хандсаар ирсэн. 

Үүнийг ч УИХ-ын гишүүн О.Баасанхүү соргогоор ажиж, элдэв хорон үгээр маажсаар байж амны хаалтыг нь зүүлгэсэн удаатай. Ийнхүү хийсэн үйлдэл, хийсэн үг нь цаг ямагт зөрж явдаг Л.Болд гишүүн ганцхан долоо хоногийн дотор хэдэнтээ амаа таглууллаа. Энэ мэт явдал цаашид давтагдахгүй байж үг, үйлдэл нь нийцдэг байхын ерөөл дэвшүүлье.

Г.Маргад