Улсын баатар Э.Бат-Үүл бие даан нэр дэвшихээр болсноо зарлалаа. Ерөнхийлөгчийн Тамгын газрын дарга асан З.Энхболдыг хаана нэр дэвшинэ тэнд нь очиж унагаана гэв. Араас нь Ерөнхий сайд асан Н.Алтанхуяг мөн бие даан нэр дэвшихээр болсноо зарлаж, холбогдох материалаа Сонгуулийн ерөнхий хүргүүлэв. Үүгээр зогсохүй ОХУ-д Элчин сайд асан, АН-ын дэд дарга Б.Дэлгэрмаа сонгуульд бие дааж өрсөлдөхөөр болов. Тэдний араас Эрчим хүчний дэд сайд асан Д.Доржпүрэвээс эхлээд П.Галиндэв, Э.Төмөрбаатар тэргүүтэй залуучууд нь ч бие даахаар болжээ.

Намын удирдлага хооронд үүссэн зөрчил нь тэднийг ийм шийдвэр гаргахад нөлөөлсөн гэх. Э.Бат-Үүлийн тухайд Ерөнхийлөгчийн Тамгын газрын дарга асан, одоогийн АН-ын даргын ахлах зөвлөх З.Энхболдтой зөрчилдөх болсоор хоёр жилийг ардаа үдэж байна.

Бичсэн нийтлэлийнх нь төлөө З.Энхболд түүнийг шүүхэд өгсөн, Э.Бат-Үүл хуулийн байгууллагын хаалгыг хэдэнтээ татсан.

Ерөнхий сайд асан Н.Алтанхуяг гэхэд АН-ын дарга С.Эрдэнэтэй эртнээс зөрчилтэй явж ирсэн нэгэн. Одоогоос жил гаруйн өмнө С.Эрдэнэ “Н.Алтанхуягийг АН-аас хассан” хэмээн хэвлэлд ярьж байлаа. Сүүлд Н.Алтанхуяг өөрийг нь АН-аас хассан баримтаа гаргаж өгөхийг С.Эрдэнээс шаардсан ч тэрбээр албан ёсны хариу өгөөгүй байдаг юм. Энэ шалтгаан нь Н.Алтанхуягийг төрөлх намаасаа бус бие даан нэр дэвших шийдвэр гаргахад нөлөөлсөн гэдэг. Б.Дэлгэрмаа бол АН-ын эмэгтэйчүүд дундаа лидер нь. Гэвч удирдлага хоорондын зөрчилдөөн нь түүнийг мөн л бие даахад хүргэж байх шиг.

Баабар хэлсэн байдаг юм, “Ардчилсан нам шинэчлэгдэхийн тулд бүр ёроолдоо хүртэл унах ёстой” гэж. Бас “С.Эрдэнэ намын дарга болсон нь энэ нам ёроолдоо хүртэл унах эхлэл болж байна” хэмээж байлаа.

2017 онд хэлсэн Баабарын эл үг өнөөдөр биеллээ олжээ. Үндсэндээ АН ёроолдоо хүртэл унаж байна. Нэгэнтээ АН-ыг удирдан чиглүүлж, хэд хэдэн ялалтыг намдаа авчирч байсан лидерүүд нь түрүүчээсээ бие даан нэр дэвшихээ ийн зарлав. Намын үйл ажиллагаандаа сэтгэл дундуур явах болсон тэд удирдлагуудаа сөрж ажиллахаа түрүүчээсээ мэдэгдэв.

З.Энхболд АН-ын дарга болсныхоо дараа намаа парламентад есхөн суудалтай болгож ялагдуулсан бол С.Эрдэнэ тамга атгаад УИХ-д бүлэггүй болгосон.

Одоо бүр намынх нь лидерүүд өөрсдийнх нь эсрэг бие даан нэр дэвшихээр болсон нь зүгээр ч нэг цаг хугацааны давхцал биш бололтой. Харин С.Эрдэнэ, З.Энхболд хэмээх хоёр хүний хоршил арвин түүхтэй Ардчилсан намыг ёроолд нь хүртэл унагаах эхлэл байжээ. Бүр янаглан хорлох замаар.

АН засгийн эрхэнд гарсан 2012-2016 онд С.Эрдэнэ, З.Энхболд нарын хоршлоор Монголын эдийн засаг туйлдаа хүрч байв. Харин энэ удаад 100 сая төгрөгийн босго тогтоож, олон арван залуучуудынхаа нэр дэвших боломжийг нь тушсан тэднээс лидерүүд нь зайгаа барьж эхэлснээр 30 түүхтэй Ардчилсан нам эргэж сэхэхгүйгээр нэгмөсөн ёроолдоо уналаа. Засгийн эрх барихаараа ашиг сонирхлынхоо төлөө хагаралддаг, зодолддог, болохгүй бол огцруулдаг, хорьдог уламжлалтай тэд энэ удаад ч эрх мэдлийн гадуур байхдаа ч ийнхүү унаган зангаа тавьсангүй. 

Бүлэггүй, лидергүй, С.Эрдэнэ, З.Энхболд гэсэн хоёрхон даргатай Ардчилсан намын хувь заяаг хөх тэнгэрт даатгах л үлдэж байна.

Чин үнэндээ С.Эрдэнэ, З.Энхболд нарын гарт АН амь тавьна гэж хэн ч төсөөлөөгүй явжээ.

Г.Эрхэс