Жилд улсын төсөвт нэг их наяд төгрөг төвлөрүүлдэг, 26 сая тонн хүдэр боловсруулж 530.0 орчим мянган тонн зэсийн баяжмал, 4.5 орчим мянган тонн молибдены баяжмал vйлдвэрлэдэг “Эрдэнэт үйлвдэр”-ийн 49 хувийн асуудалтай холбоотой асуудал өнгөрсөн баасан гарагийн чуулганаар хүчтэй шүүмжлэлд өртсөн юм.

Асуудлыг тодруулбал, Үндсэн хуулийн цэцийн дөрөвдүгээр сарын 15-ны өдрийн Дунд суудлын хуралдаанаар Үндсэн хуулийн цэцэд маргаан хянан шийдвэрлэх ажиллагааны тухай хуулийн 15 дугаар зүйлийн 4 дэх хэсэгт “Цэц зөвхөн Үндсэн хууль хүчин төгөлдөр болж үйлчилсэн 1992 оны 2 дугаар сарын 12-ны өдрөөс хойш гарсан хууль тогтоомж болон албан тушаалтны үйл ажиллагаатай холбогдсон маргааныг хянан шийдвэрлэнэ.” гэж заасан нь Монгол Улсын Үндсэн хуулийн холбогдох заалтыг зөрчсөн эсэх тухай маргааныг хянан хэлэлцсэнийг Хууль зүйн байнгын хороон дөрөвдүгээр сарын 21-ний хуралдаанаар гишүүдийн олонхийн саналаар дэмжих нь зүйтэй гэж УИХ-д өргөн мэдүүлсэн явдал.

Улмаар чуулганы үеэр ЗГХЭГ-ын дарга Л.Оюун-Эрдэнэ, ХЗДХ-ийн сайд Ц.Нямдорж нар ийм зүйл заалт оруулж ирсэн нь Үндсэн хуулийн цэц, Байнгын хорооны гишүүдийг компанид худалдагдсан хэрэг гэж шүүмжилсэн бөгөөд энэ зүйл заалтыг хүлээж авбал Эрдэнэтийн 49 хувь ард түмний өмч биш компанийн өмч болохоос гадна төсвийн орлогыг гол бүрдүүлэгчээ алдах эрсдэлтэйг сануулж байлаа.

Тэдний хэлснээр Эрдэнэтийн 49 хувийг компани өөрийн мэдэлд авахын тулд Үндсэн хуулийн цэцийг хүртэл гар, хөлөө болгон ашиглаж байна гэдгийг онцолсон.

Түүгээр ч барахгүй төрийн сайдыг өрөөнд нь дарамталж, хууль бус үйлдэл хийхийг шаардсан хуулийн байгууллагын эрхмүүд хэн байж болох вэ гэсэн албан үгийг чуулганы танхимаас дайв. Учрыг сийрүүлбэл, сайдын өрөөнд орж дарамтлах эрх мэдэл бүхий хууль хяналтын байгууллага гэж баймааргүй байлтай. Зарим гишүүний яриад, тэмцээд байдаг МАНАН-гийн гар хөл нь юм биш биз?. Ер нь МАНАН бүлэглэл, “Шударга бусын хонгил” бий гэдгийг Ерөнхий сайд асан Н.Алтанхуяг болон зарим улстөрч баталдаг.

Тухайлбал, Ерөнхий сайд асан Н.Алтанхуяг хэвлэлд “Шударга бусын хонгил-“ыг экс Ерөнхийлөгч Ц.Элбэгдорж, УИХ-ын гишүүн М.Энхболд нар хамтран үүсгэсэн. Ингэхдээ хуулийн байгууллгын нөлөө бүхий эрхмүүд хонгилыг бүтээлцдэг, гар хөлийнх нь үзүүр болдог” гэж байв.

Эл үгнээс үзвэл төрийн сайдыг өрөөнд нь дарамталж, рекит хийсэн болж таараах гээд байна. Чухам ийм эрх, дархтай нэгний ард нөлөө бүхний нэгэн байж таарах нь. Гагцхнүү тэр нь хэн бэ?

Б.Лхам