Засгийн тэргүүн өнөө маргаашгүй чухал нэг асуудлыг шийдэх зайлшгүй шаардлагатай тулгарах бололтой. Энэ нь Энэтхэг улсад хорионд ороод буй монгол иргэдтэй холбоотой асуудал. Цар тахлын эрсдэлээрээ БНЭУ хамгийн эрсдэл бүхий орны тоонд багтаж буй. Тус улсад манай улсын 500 гаруй иргэн бий бөгөөд тэдгээрийн хувьд бүгд хатуу хөл хорионд, хоол хүнсний хомсдол, халдварын өндөр эрсдэлтэй нөхцөлд байгаа юм. Тиймдээ ч дээрх иргэд эх орондоо буцах хүсэлтийг Улсын онцгой комисст удаа дараа гаргасан боловч хүсэлтийг хүлээж авахгүй байсаар өнөөдрийг хүргээд буй. 

Харин "Хүннү Эйр" компани 88 зорчигчийн суудал бүхий онгоц хөөргөж Монгол Улсын иргэдээ татан авах боломжтойгоор УОК-т мэдэгдээд буй. 

Уг хүсэлтийг хүлээж авах эсэх нь одоогоор тодорхойгүй ч тус улсад гацсан иргэдийн ар гэрийнхэн өнөөдөр Засгийн газарт шаардлага хүргүүлэхээр болжээ. 

Энэтхэгт хөл хорионд орсон иргэдийн 300 орчим нь насанд хүрээгүй хүүхэд бол цөөнгүй нь эмчилгээгээр очсон хүмүүс юм. Харин үлдсэн хэсэг нь их, дээд сургуульд суралцдаг оюутан, эсвэл богино хугацааны тэтгэлэгт хамрагдахаар очсон иргэд юм.

Ар гэрийнхний зүгээс шаардлагыг хүлээж авахгүй бол эсэргүүцлийн өөр хэлбэрт шилжихээ эхнээсээ цахимаар шаардаад буй. Энэ утгаараа УОК-т багагүй шахалт болох нь дамжиггүй юм.

УОК-оос иргэдээ татахдаа МИАТ компанийн тогтмол нислэг үйлддэггүй чиглэлд онгоц хөөргөхгүй гэсэн байр суурьтай байгааг албаны эх сурвалж өгүүлсэн.

Хэрвээ ар гэрийнхний шаардлагыг хүлээж аваад иргэдээ татахаар боллоо гэхэд МИАТ эсвэл "Хүннү Эйр" компанийн аль нэг нь нислэг үйлдэх болно. Хэрвээ "Хүннү Эйр" компанид  нислэг үйлдэх зөвшөөрөл олговол энэ завшааныг ашиглаж, агаарын замаа өргөтгөж, цаашид тогтмол нислэг үйлдэх сонирхолтой байгаа юм байна.

Гагцхүү тус компанийн онгоцыг бага багтаамжтай гэж УОК-оос голохгүй л бол цар тахлын хүнд нөхцөлд хувийн хэвшлийнхэн эрсдэлийг үл тоон ийм санаачлага гаргасан нь талархууштай. Нөгөө талаасаа цөөн тооны суудалтай онгоц хөөргөх нь манай улсад ашигтай. Учир нь тусгаарлах байрны хүртээмж тааруу, эмч, эмнэлгийн ажилчдын ачаалал их байгаа энэ цагт цөөн тооны иргэдээ 7-14 хоногийн давтамжтай авчрах нь бөөгнөрөл, ачаалал үүсгэхгүй байх давуу талтай юм. Үүнийг ч УОК-ын гишүүд ойлгож, ухаарч байгаа. Тэгвэл өнөөдөр комиссын хуралдаан болно.

Уг хуралдаанаар энэтхэг улс дахь иргэдийн нөхцөл байдлын талаар ярилцах мэдээлэл бий. Асуудлыг хэлэлцэх болсон бас нэг шалтгаан нь Энэтхэгийн талаас иргэдээ авах болбол бүх талаараа туслана гэдгээ мэдэгдсэн нь хоёр улсын дипломат харилцаагаа хүндэтгэж буй хэрэг, нөгөөтээгүүр магадгүй иргэдээ эрсдэлд орохоос нь өмнө ав гэсэн найрсаг шахалт байхыг үгүйсгэхгүй юм. Үүнээс гадна УОК-оос Энэтхэг рүү нислэг үйлдэх зөвшөөрлийг "Хүннү Эйр" компанид олгосон гэх мэдээлэл цахим орчинд түгээд буй. Тэгвэл энэ мэдээлэл ташаа байх үндэслэлтэй. Учир нь энэ сарын 27-нд болох байсан УОК-ын хуралдаан тодорхойгүй шалтгаанаар хойшилж, өнөөдөр болохоор товлогдсон.

Хэрвээ өнөөдрийн хуралдаанаас иргэдээ татах шийдвэр гаргалаа гэхэд МИАТ уу, "Хүннү Эйр" хоёрын аль нэгийг сонгох хэрэгтэй болно. Гагцхүү асуудлын хариултыг Ерөнхий сайд л мэдэх байх.

Г.Маргад