“Намайг УИХ-ын гишүүний бүрэн эрхээрээ түрий барьж, хууль, хяналтын байгууллагын үйл ажиллагаанд саад болж байна гэсэн ойлголтыг нийгэмд зохион байгуулалтайгаар хүргэж байна. Тэгэхээр би өөрийн хүсэлтээр чөлөөлөгдөх өргөдлөө өгье гэдгээ мэдэгдсэн” хэмээгээд УИХ-ын хаалгаар гарсан Н.Номтойбаяр эргээд тооноор орж ирэх бололтой. УИХ-аас бүрэн эрхийг нь түдгэлзүүлж, МАН-аас улс төрийн дэмжлэг хүлээх боломжгүй болсон түүний хувьд ирэх сонгуульд бие даан нэр дэвшихээр болсон тухай мэдээлэл гарч эхэлжээ. Үнэн бол Н.Номтойбаярыг тойрсон хэд хэдэн асуулт гарч ирнэ.

Нэгдүгээрт, түүнийг бүрэн эрхээс нь түдгэлзүүлж шалгахаар болсон прокурорын үндэслэл биеллээ олж, Н.Номтойбаярыг шалгаж эхэлсэн үү?.

Бүрэн эрхийг нь түдгэлзүүлсэн нэгдүгээр сараас хойш өнөөдрийг хүртэл хугацаанд түүнийг шалгаж байгаа эсэх талаарх мэдээлэл гараагүй. Н.Номтойбаяр гишүүн ч ямар нэгэн байдлаар ил гараагүй явж ирсэн юм.

Өөрийнх нь хэлснээр “Сүүлд хийсэн хэвлэлийн хурлын үеэр хэргийн нууц задруулсан гэдэг үндэслэлээр бүрэн эрх түдгэлзүүлэх санал ирүүлсэн. Үнэхээр хэргийн нууц задалсан бол энэ нь эрүүгийн хэрэг болно. Гэтэл нууц задалсан, эсэхийг шалгаагүй, надад ч мэдэгдээгүй. Би бүрэн эрхийн байдлаа давуу тал болгож, зугтаасан зүйл байхгүй. Энэ нь өөрөө саналаараа түдгэлзэх үндэслэл биш. Би хууль зөрчөөгүй, надад бодож үзэх юм байхгүй” гэж байв.

УИХ-ын гишүүн асан Г.Батхүү Төрийн ордонд амь насаа алдсан хэрэг, сайдаар ажиллаж байхдаа Хөдөлмөр эрхлэлтийг дэмжих сангаас бусдад давуу эрхтэйгээр зээл олгосон зэрэг асуудал нь түүнийг шалгах үндэслэл болсон байдаг.

Хоёрдугаарт, Н.Номтойбаяр хаанаас бие даан нэр дэвших нь сонирхолтой сэдэв. Хоёр удаа сонгогдсон, Дорнод аймагтаа дэвших магадлал нь өндөр ч төрөлх МАН-аас түүнтэй өрсөлдөх нэр дэвшигчид хараахан тодроогүй байгаа юм. Гол нь, Н.Номтойбаяр бие даан нэр дэвшлээ гэхэд түүнийг тойрсон таагүй мэдээллүүд өрсөлдөгчдөд нь боломж олгоно. Тэгээд ч хуулийн байгууллагаар шалгуулж эхэлсэн, хамгийн гол нь гэм буруутай эсэхийг нь шүүхээр эцэслэн тогтоогоогүй байгаа энэ нөхцөлд Н.Номтойбаяр ямар байдлаар нэр дэвших өөрөө эргэлзээтэй. Тэр явсан шигээ ирж чадах уу?

Г.Эрхэс