УИХ-ын үдээс хойшхи чуулганаар Цар тахлын үед Санхүү эдийн засгийн тогвортой байдлыг хангах хуулийн төслийг хэлэлцэж байна. Энэ үеэр гишүүдийн хэлсэн үгнээс хүргэж байна.

Д.Сарангэрэл: Дээрх хуулийн төсөл боловсруулсанд талархаж байна. Гэхдээ эмч эмнэлгийн ажилтан гэснийг төрийн үйлчилгээний болон захиргааны байгууллага гээд тусгачихлаа. Уг нь анхны хэлбэрээр нь тусгах нь зүйтэй байсан юм. Эрүүл мэндийн салбар ажилчдадаа орон сууц гэхээс илүү яамны байр ч хэцүү байдаг. Эхний ээлжинд 4000 орон сууцанд төрийн албан хаагчдыг оруулна гэж байна. Үүний 80 орчим хувийг эрүүл мэндийн салбарт өгөх хэрэгтэй. Эрүүл мэндийн салбарт ямар ч боломжгүй байгаа. Тэр бүр олдоод байдаггүй. Түрээсийн байранд оруулаад орон сууцныхаа мөнгийг төлөөд энэ нь яваандаа өөрийн болгох эрх нээж өгч байгаа. Энэ нь эрүүл мэндийн салбарт ус, агаар мэт хэрэгтэй. Боломжгүй хүмүүсээ эхлээд харж үзэх хэрэгтэй. 50 гаруй мянган хүн өдөр шөнөгүй ажиллаж байгаа. Ялангуяа голомтод ажиллаж байгаа эмч нарт өгөх хэрэгтэй.  

Г.Занданшатар: НОСК, Хотын дарга, Сангийн яам зэрэг холбогдох ажлын хэсгийг оролцуулж хэд хэдэн удаа ярилцсан. Одоо орон сууцанд биш гэр хороололд ажиллаж байгаа эмч эмнэлгийн ажилтан, онцгой, цагдаагийн алба хаагчдын тоог гаргасан. Зөвхөн эмч эмнэлгийн ажилтан гээд хязгаарлуулж болохгүй байна. Засгийн газраас 60 тэрбум төгрөгийг батлаад өгчихсөн. Үүнээс 34 тэрбум төгрөгийг НОСК-д шилжүүлснээр биелэх юм. Одоо ашиглахад бэлэн 4000, баригдаж байгаа 60 мянган орон сууц байна.

Б.Лхам