Архангай аймгийн АН-ын даргын үүрэгт ажлаас нь чөлөөлөх гэж буйг эсэргүүцэж тус аймгийн намын гишүүд АН-ын дарга С.Эрдэнэд өнөөдөр шаардлага хүргүүллээ. Энэ талаар Архангай аймгийн АН-ын дэд дарга Г.Эрдэмхишигээс тодрууллаа.

-Архангай аймгийн АН-ын дарга М.Батжаргалыг үүрэгт ажлаас нь түдгэлзүүлж  байгаа гэсэн мэдээллийг танай гишүүд өглөө. Үүнтэй холбогдуулан АН-ын дарга С.Эрдэнэд шаардлага хүргүүллээ. Ажлаас нь чөлөөлөх болсон шалтгаан нь юу юм бол?

-Хоёр хүн гомдол гаргасан байна лээ. Манайх намын орон нутаг дахь штаб. Орон нутагт өрсөлдөх гэж байгаа юм чинь намын анхан шатны үүрийн сонгуулиар ажиллах боломжийг хангах ёстой. Энэ дагуу намын Үндэсний бодлогын хорооны гишүүдээсээ гурвалсан гэрээгээр санхүүжилт босгож, шаардлагатай гэсэн материалуудаа худалдан авч салбар үүрүүдэд компютер, принтер хүргэж өгсөн. Гэтэл энэ үйлдэл нь буруу гэж Архангай аймгийн АН-ын Үндэсний бодлогын хорооны гишүүн Жаргалан, Золжаргал гэж хоёр хүн гомдол гаргасан. Үндсэн дүрэмд намын хорооны дарга нь удирдан зохион байгуулах чиг үүрэгтэй. Санхүүгийн асуудлыг хэрэг эрхлэх хариуцана гэж заасан байдаг. Нэг үгээр хэлбэл, дүрмийнхээ дагуу ажил үүргээ гүйцэтгэсэн асуудлыг дүрмийн биш гэж үзэж, хуралдаж шийдвэр гаргах нь өөрөө дүрмийн биш үйлдэл болж хувирна гэсэн үг. Гэтэл ийм шалтгааны улмаас М.Батжаргалыг ажлаас нь түдгэлзүүлж, үүрэг гүйцэтгэгч томилох гэж байгаа тухай мэдээлэл бидэн ирсэн.

Үүнийг сонсоод Архангай аймгийн АН-ын гишүүд Улаанбаатар хотод иртэл Үндсэн дүрмийн хорооны өнөөдрийн хуралдаанаар энэ асуудлыг хэлэлцэх тухай мэдээлэл байна. Эндээс урьдаас төлөвлөчихсөн байсан үйлдэл гэж бид хардаж байна.

Энэ асуудлыг яаравчлан шийдэх гэж улайрч байна. Гэтэл сонгуульд хаяанд ирчихлээ. Ийм цаг үед аймгийн АН-ын даргыг сольж үүрэг гүйцэтгэж томилж байсан түүх байхгүй. Сонгууль болох гэж байхад ийм шийдвэр гаргах нь хэнд ашигтай юм бэ. Мэдээж сөрөг хүчинд ашигтай. Бид үүнийг хүлээн зөвшөөрч чадахгүй. Танил тал, хувийн ашиг хонжоо хайдаг зүйл салбар хороодод хүртэл нөлөөлдөг боллоо. Үнэхээр ийм зүйл болбол би үүнийг АН гэж үзэхгүй. Ардчилал ийм байх ёсгүй. Ямар нэг хуйвалдаанаас гарсан үр дүн гэж дүгнэж байна.

-С.Эрдэнэ даргатайгаа энэ асуудлаар холбогдож үзэв үү?

-Сумдуудын намын дарга нар бичиг хүргүүлсэн. Нэг зөрчилдөөн үүссэн. Үндэсний бодлогын хорооны гишүүнээр сонгогдох хүнийг тухайн орон нутагтаа хэр чадавхтай ажилласан, бусдад хүлээн зөвшөөрөгдсөн зэргээр нь үнэлдэг. Энэ утгаараа манай ҮБХ-ны гишүүнээр дөрвөн жил, улстөрийн зөвлөхөөр хоёр ажилласан н.Мөнхсайханыг нэр дэвшихэд дэмжиж өгнө үү гэдэг бичгийг С.Эрдэнэ даргад Архангай аймгийн 15 сумын дарга нар явуулсан юм.

Гэтэл “Та нар энэ хүнийг ингэж дэмждэг хэн бэ. Юу бэ” гэдэг хариу үйлдлийг бидэнд үзүүлсэн. Үүнээс гадна АН-д тулгамдаад байгаа хамгийн том асуудал нь 100 сая төгрөгийн дэнчингийн асуудал дээрээсээ доошоо нөлөөлж байна.

Бидний дүгнэлтээр бодит ажил хийсэн хүний ажлыг 100 сая төгрөг төлсөн хүнээр үгүйсгэж байгаа хэрэг.

Ийм хагарал үүсээд байна. Шулуухан хэлбэл, “Үгэнд ор, орохгүй бол зайлцгаа” гэдэг байдлаар самарч байна. Хэн нэгний эрх ашгийн төлөө үйлчлээгүйнхээ төлөө энэ мэт шударга бус үйлдлийн золиос болбол АН-ын гишүүд эсэргүүцэх нь лавтай. Эсэргүүцсэн учраас ч өнөөдөр шаардлага хүргүүлж байна. Үнэхээр ардчилиллын төлөө гэж байгаа юм бол ийм шударга бус үйлдэл гаргаж болохгүй. 

Г.Нацаг