УИХ-ын чуулганы үдээс хойших хуралдаан эхэллээ. Уг хуралдаанаар Агаарын бохирдлыг бууруулах талаар авч хэрэгжүүлж байгаа арга хэмжээний талаарх Засгийн газрын мэдээллийг сонсож байна.

Энэ үеэр Б.Пүрэвдорж гишүүн “Хөдөө орон нутгаас орж ирсэн хүний нүд, хоолой нь хорсдог. Сайжруулсан түлшний хүрээнд харьцангуй гайгүй болсон байх. Гэхдээ энэ зун зүгээр сууж болохгүй. Туршилтын ажлуудаа сайн хийх ёстой. Хүний эрүүл мэнд нөлөөлөхгүй байдлаар хийх ёстой. Тэгж байж утаанаас сална. Ховд утаатай аймгуудын нэг. Нөгөөтэйгүүр, хоёр суманд айлуудын инженерийн шугам сүлжээнд холбох ажлыг хийж байгаа. Үүний үр дүнг харах ёстой. Тодорхой хэмжээнд утаатай нэг, хоёр аймгийн фокуслаад дорвитой ажил хийх хэрэгтэй. Засгийн газар аймгуудыг утаагүй болгох ажлыг эхлүүлэх ёстой. Хамгийн гол асуудал нь орон сууцжуулах юм” гэлээ.

Харин сайд Н.Цэрэнбат “Орон нутагт өнгөрсөн жилээс тодорхой хэмжээнд 200 сая төгрөг хүртэлх мөнгө өгсөн. 2019 оноос агаарын бохирдлыг бууруулах тоног төхөөрөмжөөр хангахаар болсон. Үүний нэг нь Ховд. Улаанбаатарт үлгэр жишээ болсон ажлыг орон нутагт хэрэгжүүлэх ёстой. Аймгийн төвүүдэд байгаа нам даралтын зууханд утаа шүүгч суулгасан. Пүрэвдорж гишүүний хэлдгээр цаг хугацаа, өртөг өндөртэй” гэв.

Мөн Эрчим хүчний сайд Ц.Даваасүрэн “Шахмал түлшинд эргэлзэх зүйл байхгүй. Гэхдээ тайвшрах болоогүй. Налайх дүүрэгт барьж байгаа үйлдвэрийг сүүлийн үеийн технологиор барьж байгаа, намар ашиглалтад оруулна. Угаартах асуудлын хувьд иргэдийн зуухны нөхцөл байдлаас шалтгаалдаг. Олон жилийн дунджаас харахад угаартах тохиолдол тав, аравдугаар сард гардаг. Энэ жилийн хувьд нэлээд халуун байгаа учраас оройдоо гал түлэх асуудал төдийлөн гарахгүй байх. Европийн оронд зуухны стандарт гэж байдаг. Манайд бол байхгүй” гэсэн юм.

С.Сүлд