Улсын Их Хурлын чуулганы үдээс хойших хуралдаан эхэлж байна. Хуралдаанаар Агаарын бохирдлыг бууруулах талаар авч хэрэгжүүлж байгаа арга хэмжээний талаарх Засгийн газрын мэдээллийг сонслоо. Энэ үеэр гишүүдийн ярьсан саналаас хүргэж байна. 

Б.Пүрэвдорж: Дэлхийн улс орнууд утаатайгаа захиргааны аргаар тэмцэж байжээ. Тухайлбал, Лондон хотод манангийн улмаас нэг өвлийн дотор 12 мянган хүн нас барж байжээ. Улмаар гаднаас нүүрс оруулахгүй байх зэрэг арга хэмжээ авсны үндсэн дээр манангаасаа салсан юм байна лээ. Яг энэ аргыг Засгийн газар хэрэгжүүлж байгааг дэмжиж байна. Гэхдээ орон нутгаас орж ирсэн иргэд нийслэлд орж ирэхээрээ нүд, хоолой нь хорсож байна. Их хүхэрлэг байна гэдэг зүйлийг ярьж байсан. Мөн сайжруулсан түлшээ зөв хэрэглэж чадаагүйн улмаас өнгөрсөн өвөл цөөнгүй иргэд амиа алдсан тохиолдол гарсан. Тиймээс сайжруулсан түлшинд химийн бодис ордог гэсэн хүмүүсийн хардалтаас ангид байлгах, хүний эрүүл мэндэд нөлөөлөхгүй байх хольцуудаа хийх, туршилтуудаа бүрэн хийх шаардлагатай байна. 

Хоёрдугаарт, Ховд аймаг нэлээд утаатай аймгийн тоонд ордог. Ховд аймгийн төвийн хоёр баг дээр төсөл хэрэгжиж байна. Айлуудыг шугам сүлжээнд холбох ажлын үр дүнг нь харъя гэж бодож байгаа. Ер нь хамгийн үр дүнтэй арга бол барилгажилт байдаг. Тиймээс тодорхой хэмжээнд утаа ихтэй нэг хоёр аймгийг сонгож аваад арга хэмжээ хэрэгжүүлж үр дүнтэй байвал бусад аймгуудад нэвтрүүлдэг баймаар байна.

А.Сүх