Тагнуулын ерөнхий газрын Гадаад тагнуулын газрын дарга асан Ш.Амгаланг энэ сарын 3-нд тагнуулын албаны алба хаагчид баривчилж, гэрт нь нэгжлэг хийсэн билээ. Энэ талаар Амгалан хурандаагийн гэргий н.Оюунгэрэл мэдээлэл хийлээ.

Тэрбээр би эрүүл мэндийн салбарт 30 гаруй жил ажилласан эмч хүн. Гэр бүлийн хүн маань ОХУ-д суралцсан, эрхзүйч, хуульч мэргэжилтэй. ТЕГ-д 20 гаруй жил ажиллахдаа үүргээ нэр төртэй биелүүлж ирсэн. Энэ сарын 3-нд бид хоёр охиныхоо хамт Эмээлт орчимд салхилчихаад буцаж явах үед гурван автомашин зам хааж зогссон. Автомашинаас 10 гаруй залуус бууж ирээд манай нөхрийг буулгаж, толгойд нь хар уут углаж, машиндаа суулгасан. "Хаанаас ирсэн хүмүүс бэ" гэж асуухад "Дараа хэлье" гэсэн. Замд миний даралт ихэссэн учир "Эмнэлэг орж тариа хийлгэе" гэхэд зөвшөөрөөгүй. Утас хурааж аваад яриулаагүй. Явсаар байгаад манай гэрийг нэгжсэн. Ажлаа хийж байхад нь 2017 онд гэнэт халсан. Ажилгүй, тэтгэвэргүй болсон. Д.Гэрэл даргыг хууль зөрчиж ажилд томилсон гэж Үндсэн хуулийн цэцэд өргөдөл өгсөн.

Гэвч ҮХЦ-ийн дарга Д.Одбаяр үүнийг авч хэлэлцээгүй. Би бол улсад 30 гаруй жил ажиллахдаа "Бөөрний Оюунгэрэл" гэсэн алдар хүртэл хүртэж явлаа.

Манай хүн ЗХУ-д долоон жил суралцаж төгсөж ирээд тагнуулд ажилласан. Террорезмтэй тэмцэхтэй зөвлөлийн дарга, Гадаад тагнуулын албаны даргаар ажиллаж байсан. 

Ямар нэг хувийн бизнес бидэнд байхгүй. Цалингаас цалингийн хооронд амьдралаа залгуулж ирсэн сэхээтэн гэр бүл. Монголд хууль гэж байдаг юм уу. Д.Гэрэл гэдэг хүн Монголын хууль хяналтын байгууллагыг самарч гүйцлээ. Өнгөрсөн шөнө баривчлагдаад явахаар нь арга буюу олон нийтийн хэрэгслээр мэдээлэл хийлээ. Миний нөхөр твиттерт жиргэдэг. Ингэхдээ ямар нэг зохион байгуулалттай зүйл хийдэггүй. ТЕГ-ын дарга Д.Гэрэл нь БНСУ-д Элчин сайдаар сууж байхдаа Хотгор шанагын уурхайн наймаанд оролцсон нь Монгол, Солонгос улсын хэвлэлээр цацагдсан. Үүнийг нь жиргэсний төлөө баривчилсан. 

Би хөлөө хүрэх газар хүртэл явна. Миний нөхрийн толгойноос нэг ширхэг үс унасан байх юм бол Д.Гэрэлээс хариуцлага нэхнэ. Бид ах, дүү олуулаа. 300 гаруй хүн гарын үсэг зурж өргөдөл бичсэн. 

Амралтын өдрөөр баривчилдаг нь ямар учиртай юм бэ. Манай гэр бүл хувийн бизнес эрхэлдэггүй, ашиг сонирхолын зөрчилгүй ийм ахмад тагнуулч. Гурав дахь удаагаа хуулийн байгууллагад өгсөн. Прокурор, цагдаагаас гэмгүй гээд цагаатгаж, гомдлыг нь хэрэгсэхгүй болгож байсан.

Миний биед гэмтэл учруулсан. Гар хөхөрсөн" гэлээ.

Г.Маргад