УИХ дахь МАН-ын бүлгийн хурлаар Засгийн газраас өргөн барьсан “Алсын хараа-2050” бодлогын баримт бичгийн талаар хэлэлцэж, сонгуулиас өмнө шийдвэрлэхээр болжээ.

Энэ талаар УИХ-ын гишүүн С.Бямбацогт “Үндсэн хуулийн дараа орох хамгийн том бодлогын баримт бичгийг УИХ энэ долоо хоногт анхны хэлэлцүүлгийг хийх гэж байна. Монгол төрийн зорилго болсон төрийн хар хайрцагны бодлогыг батална. Үүнтэй холбогдуулан УИХ-ын даргын тушаалаар ажлын хэсэг байгуулагдсан. Ажлын хэсэг нийт гурван удаа хуралдаж, бодлогын баримт бичгийг танилцуулсан.

УИХ-д суудалтай бүх намуудын төлөөлөл, эрдэмтэн судлаач зэрэг 1500 гаруй хүний оролцоотой хийсэн. 2016 онд “Монгол Улсын тогтвортой хөгжлийн зорилт-2030” баталсан байдаг. Энд тавигдсан зорилтыг “Алсын хараа-2050”-д нэгийг ч орхигдуулахгүй байхаар суулгах зорилт тавин ажилласан. Ингэхдээ зарим алдаатай тооцсон заалтуудыг залруулах ажлыг хийсэн юм. Тухайлбал, 2030 он гэхэд ядуурал 15 хувьд, 2040 онд 10 хувь 2050 он гэхэд 5 хувьд оруулах зорилт тавьсан. Мөн нэг хүнд ногдох ДНБ-ийг 2030 онд 12 мянган ам.доллар, 2050 онд 38 мянган ам.доллар байхаар тооцсон” гэлээ.

Б.Лхам