УИХ дахь МАН-ын бүлгийн хурлаар хэлэлцсэн асуудлын талаар УИХ-ын гишүүн Д.Тогтохсүрэн танилцууллаа. Энэ үеэр тэрбээр сэтгүүлчдийн асуултад хариулт өгсөн юм.

-Удахгүй МАН-ын Бага хурал болно. Гэвч намын гишүүд өөр хоорондоо тойргоо булаацалдаж, их хагаралтай байна гэсэн мэдээлэл явж байна. Үүнтэй холбогдуулан зарим гишүүд бие даан нэр дэвших асуудал яригдаж байгаа гэсэн үнэн үү?

-Сонгуулийн тухай хуулиар энэ сарын 16 хүртэл нэр дэвших эрх нээлттэй. Манай намын Бага хурал энэ сарын 15, 16 хавьцаа хуралдаж, нэр дэвшигчдээ эцэслэж, шийдвэрлэнэ. МАН-д хагарал гэсэн зүйл байхгүй. Ямар ч асуудалгүй эв нэгдэлтэй байгаа гэдгийг хэлье. Бие даан нэр дэвшиж намдаа шантааж үүсгэж байгаа гишүүн байхгүй. Намын даргын хэлсэн зарчмын дагуу нэр дэвшигчдээ тодруулах ажлыг хийнэ.

-Нөхцөл байдалтай уялдуулан сонгуулийн зардал нэмэгдэх хандлагатай байна. Санхүүжилтийг хаанаас гаргах вэ?

-Энэ жилийн сонгууль нөхцөл байдлын хувьд хүндэрч магадгүй байна. Цар тахал энэ хэвээр үргэлжилбэл сонгуулийн сурталчилгаанд нөлөөлнө. УИХ-аар Коронавируст халдварын цар тахлаас урьдчилан сэргийлэх, тэмцэх тухай  хууль батлагдсан. Уг хуульд тодорхой заалт орж ирсэн. Засгийн газар, Сонгуулийн ерөнхий хорооноос энэ чиглэлээр ажиллаж байна. Өнөөдрийн нөхцөл сонгуулийн сурталчилааг хэрхэн явуулах, хязгаарлалтын дэглэмийг яаж баримтлах зэрэг олон асуудал бий. Энэ чиглэлээр СЕХ-оос санал боловсруулж бэлтгэсэн байна лээ. Засгийн газар дээрх хуулийн дагуу шинээр нэмэгдэж гарч байгаа зардлыг шийдвэрлэх боломжтой гэж үзэж байгаа юм. Харин сонгуулийн сурталчилгаа хэрхэн явагдах тал дээр УОК-оос тодорхой шийдвэр гаргах байх.

-Ойролцоогоор хэчнээн төгрөгийн нэмэлт зардал гарна гэж үзэж байгаа юм бэ?

-Засгийн газрын нөөц хөрөнгөнөөс дөрвөн тэрбум төгрөг гарах боломжтой гэж үзсэн байна лээ.

Б.Лхам