Монгол Улсын Ерөнхий сайд У.Хүрэлсүх эдийн засгийг дэмжих, иргэдийн амьжиргаанд дэмжлэг үзүүлэх хөтөлбөрийг хэрэгжүүлэх талаар мэдээлэл хийлээ. Тэрбээр "Засгийн газар ээлжит хуралдаанаар хүүхэд, хөгжлийн бэрхшээлтэй, нийгмийн эмзэг бүлгийн иргэдэд санхүүгийн дэмжлэг үзүүлэх Цар тахлын үед төсвийн зохицуулалт хийх, зарим арга хэмжээний тухай тогтоол, Цар тахлын үед эдийн засгийг сэргээх, эмзэг бүлгийн иргэдийн нийгмийн хамгааллыг сайжруулах хоёрдугаар багц арга хэмжээг гэсэн хоёр тогтоол баталсан.

Өнгөрсөн хугацаанд улсын төсвөө нэмэгдүүлэх чиглэлээр сайн ажилласан. Энэ ч утгаараа хэдэн төгрөг цуглуулсан. Үүнийгээ цаг үе хүндэрсэн энэ нөхцөлд ард иргэдийнхээ орлогыг хамгаалахад зарцуулах нь зүйтэй гэж үзлээ. 

Засгийн газрын хуралдаанаар 0-18 насны хүүхэд бүрт дөрөвдүгээр сарын 1-ээс аравдугаар сарын 1 хүртэл сар бүр 100 мянган төгрөг олгоно. Өөрөөр хэлбэл, дөрвөн хүүхэдтэй айл сар бүр 400 мянган төгрөг авна гэсэн үг. 

Мөн хүнсний талоныг насанд хүрсэн 122 мянган иргэнд сар бүр 16 мянган төгрөг олгодог байсныг 32 мянга, 112 мянган хүүхдэд 8000 төгрөгийн талон өгдөг байсныг хоёр дахин нэмэгдүүлж байна. Ирэх сарын 1-нээс ирэх аравдугаар сарын 1-ийг хүртэл үргэлжилнэ.  

Гуравт, нийгмийн халамжийн тэтгэврийг 100 мянган төгрөг олгоно. Халамжийн сангаас тэтгэвэр авдаг 3600 хүн бий.

Энэ хүмүүс сар бүр 180 мянган төгрөг авдаг байсныг нэмж байгаа. Хөгжлийн бэрхшээлтэй 42500 мянган иргэнд мөн 100 мянган төгрөг нэмж олгоно.  Одой иргэдэд мөн адил мөнгө нэмж олгоно. Тэжээгчээ алдсан 16500 орчим өнчин хүүхэд бий. Эдгээрт мөн адил 288 мянган төгрөг олгоно. Өрх толгойлсон эцэг, эхчүүдэд мөн адил мөнгө олгоно. Нийт 31.1 тэрбум төгрөг нэмж гарна. Нийт 547.2 тэрбум төгрөг зарцуулна. Малчдад ноолуур тутамд 20 мянган төгрөг олгоно" гэлээ.